Shillong, Jylliew 04:
Ka Shillong Lajong Football Club kaba dei ka lahduh jong ka aiom ba la lah, mynta ka kynti la ïoh rung biang sha ka semi-final jong ka lympung Meghalaya State League (MSL) 2023. Kane ka wan urlong hadien ba ïakhaid ha ka jingïakhun pyrshah ïa ka Seven United ha ka Group C kaba la long ha ka sngi Saitjaiñ ha madan MDSA ha Mawkyrwat.
Ha kane ka sngi ka la don ka jingpynkylla ïa ka jingïalehkai ha ka Group-D, ha kaba ïa ka jingïalehkai hapdeng ka Chipakkore pyrshah ïa ka Wa’sa FC la rah noh sha ka sngi Nyngkong. Katba ha kiwei pat ki jingïalehkai, ka Rangdajied United ka la lah ban pynliem noh ïa ka Youth Club Pdengkarong da 3-2 kol ha ka Group B katba ka Langsning pat ka la pynliem noh ïa ka Jyntru da 4-0 kol ha ka Group A.
Ka jingïakhaid ka la pynkut noh ïa ka jingjop laisien linter jong ka Shillong Lajong hynrei ka jingbym shah rem, ka la plie lynti ba kan ïoh rung sha ka semi-final hynrei tang kawei ka jingdiaw na ka bynta ka club kan dei ka jingshah sei ‘red card’ jong u Babysunday Marngar, kaba la long ruh ha ka por shwa ban wai ka jingïalehkai bad kane, kan dei ka jingduhnong kaba khraw namar un nym lah ban ïadon bynta bad ka club ha ka jingïakhun ban wan.
Watla ka Shillong Lajong ka la ïakhaid ha kane ka jingïalehkai, ka dang sah sa kawei ka jingïakhun, katba kane ka jingïalehkai kan dei pat kaba khatduh na ka bynta ka Seven United ha ka lympung MSL 2023, watla ka khlem mad nam rem, kata ban khur jingjop 2 sien bad ïakhaid 3 sien, kata ban khur 9 point, katba ka Shillong Lajong ka la ïoh 10 point.
Haba phai pat sha ka jingïalehkai ha madan Kiang Nangbah Stadium ha Jowai, ka Rangdajied United kaba la dep ban buh jaka lypa ha ka semi-final, watla ka la sei da ki rangïalehkai kiba kham khynnah hynrei ki la lah ban sdang ha ka rukom kaba biang, ha kaba tang ha ka minit kaba 3, ka la ïoh ban khyrwit kol lyngba u kapten u Balamlynti Khongjee hynrei tang hadien 10 minit, ka Pdengkarong ka la ïoh ban pynphai ïa kane ka shi kol lyngba u Kindness Mukhim.
Ha ka kylla miet, ki rangïalehkai ka Rangdajied United ki la ïakhun tyngeh bad dei ha ka minit ba 65 ba u Oresterwell Langshiang u la ïoh thep ïa ka kol kaba ar bad u Balamlynti Khongjee u la thep ka kol ba lai ha ka minit ba 83 hynrei ki rangïalehkai ka Pdengkarong kim shym la duh mynsiem bad ïakhun tyngeh hynrei ha kaba kut ki la ïoh ban pynphai sa tang shi kol lyngba u Marshial Nongrum.
Haba phai pat sha ka jingïalehkai ha Shillong, ka Langsning ka la lah ban khur jingjop da kaba suk ha ka jingïakhun pyrshah ïa ka Jyntru 4-0 kol. Tang ha ka minit kaba 3 u Kampher Pale u la ïoh ban khyrwit ïa ka kol kaba nyngkong bad ha ka minit ba 18 u Wilbert Marbaniang u la thep ka kol ba ar bad ha ka minit ba 73 u la thep ka kol ba lai bad u Roikhihbha Nongtdu u la thep ka kol ba saw ha ka minit ba 78.
Watla ka Langsning ka la jop, hynrei ka la hap ban hun noh ïa ka kyrdan kaba ar, namar ka Mawlai ka la dep ban buh jaka lypa ïa lade ha ka semi-final na ka Group-A.
Ki jingïalehkai ban long ha ka sngi Nyngkong, ka 5 tarik, kata ha ka Group-C ha Mawkyrwat kan long hapdeng ka Mawten pyrshah ïa ka Lumdiengngan ha ka por 3 baje janmiet bad ha ka Group-D ha Tura kan long hapdeng ka Chipakkore pyrshah ïa ka Wa’sa FC ha ka por 3 baje janmiet.
