Shillong, Jylliew 04:
U MLA ka Nongkrem bad uba dei ruh u President ka Voice of the People Party (VPP), Bah Ardent M Basaïawmoit u la sdang ban ïoh bor ha ka Sngi Saitjaiñ hadien ar sngi ba u la sangeh shah thngan hajan ka jaka ïeng kali Additional Secretariat ha ka 1 tarik Jylliew, 2023 ha ka por 4 baje janmiet.
U Bah Ardent u la shong shah thngan haduh shiphew sngi hajan Additional Secretariat kaba la sdang naduh ka 23 tarik Jymmang, 2023 bad pynkut ha ka 1 tarik Jylliew 2023. Kane ka wan hadien ba ka sorkar ka la mynjur ban thaw da ka ‘Expert Committee’ ban peit bniah biang halor ban pynkylla ïa ka bhah thung kam thung jam ha ka jylla.
Kum ban shu pynkynmaw, u Bah Ardent ha kane ka jingïakhih da kaba shah thngan u la pdiang na ka jingai jingmut ki doktor ban pyndait noh da ka ‘drip’ ha ka sngi kaba khyndai namar ka met jong u ka la sdang tlot khnang ban nym ktah ïa ka koit ka khiah.
Haba ïakren bad u Bah Batskhem Marboh uba dei u nongaiktien ka VPP, u la ïathuh ba u Bah Ardent u la sdang ban khlaiñ naduh ka Sngi Saitjaiñ hadien ar sngi ba u la sangeh shah thngan namar u la lah ban bamja haba u la wanphai sha ïing.
Halor ka jingmynjur ka sorkar ïa ka Expert Committee, u Bah Batskhem u la ïathuh ba ka seng ka la dep dawa ban da buh da ka por haba kan thaw ïa ka Committee, hynrei ki briew jong ka sorkar ki la kyrpad ban ailad ba kin pyrkhat.
Nalor kata, u la ïathuh ba ka seng kan dang buddien ba ka sorkar ka dei ban thung noh ïa ki dkhot bad ka dei ban buh por ruh ba kane ka komiti kan pyndep khnang ban nym pynslem kai ïa ka por.
Kumta u don jingkyrmen ba ki dkhot kiba ka sorkar kan thung kin long kiba lah ban ai jingmut na ka bynta ka jingmyntoi jong ka jaidbynriew halor ka jingïoh kam ïoh jam.
Kum ban shu pynkynmaw kane ka jingshah thngan u Bah Ardent ka la ai mynsiem ïa u namar ki paidbah na kylleng ka Bri u Hynñiewtrap ki la wan ban ai mynsiem bad jingkyrshan kat haduh ba pynlong ïa ka sorkar ban kan mynjur ban thaw da ka Expert Committee ba kan peit bniah biang ïa ka bhah thung kam thung jam hapoh ka jylla.
