Shah kem 4 ngut ki nongkhaïi drok, kurup jingdih pynbuaid, pisa, thuk-thuk

La ujor mukotduma ha thanat Phulbari bad la buddien ruh ïa ki jingïadei ba shakhmat bad shadien jong ki.

Tura, Jylliew 04:

Haba phai sha ka jingïakhun pyrshah ïa u drok, ki pulit ka West Garo Hills ha ka Sngi U Blei ki la kem noh ïa 4 ngut ki briew kiba donkti ha ki kam khaïi drok bad ïoh kurup ruh ïa shibun ki jingdih pynbuaid lem bad kiwei-kiwei ki mar na kitei ki briew.

Ïa kitei kiba shah kem la tip kyrteng kum u Aziar Mondol (44 snem ka rta) na Rajpur, Phulbari,  Ziadur Mondol (25 snem ka rta), na Rajpur, Phulbari, Riazul Mondol (20 snem ka rta), na Rajpur, Phulbari bad  Zobeda Bibi (35 snem ka rta), na Rajpur, Phulbari.

Ki pulit ki la pyntip ba ïa kitei ki mar be-aiñ la lap ha ka por ba khynra ïa uwei na kitei ki 4 ngut – Aziar Mondal, ba la pynlong da ka ANTF hapdeng ka miet Sngi Saitjaiñ bad ka step Sngi U Blei.

Ki mar ba la ïoh kurup ki kynthup ïa 2.5 kilo u Kynja, 620 tylli ki dawai kuli ‘Yaba’, 29 tylli ki dawai kuli ‘Nitrazepam’, 12 song ki kot kyllaiñ duma, T. 67,840, ka thuk-thuk ‘TVS Apache’ (ML-08-J-0156), 4.5 gram u ‘Heroin’, 39 tylli ki dawai kuli ‘Tramadol’, 10 tylli ki synduk thylli ba thep ‘Heroin’, 450 tylli ki tyndong thylli, 9 tylli ki ‘mobile phone’ bad 10 tylli ki ‘lighter’.

“La suba jur ba kitei ki nongkhaïi drok ba la kdew haneng ki la ïoh ïa u drok na ki ‘distributor’ kiba na ki Jylla ba marjan bad ki la kiew shi kat dei ha ka spah ka phew da kaba khaïi drok. La ujor mukotduma ha thanat Phulbari bad la buddien ruh ïa ki jingïadei ba shakhmat bad shadien jong ki. Ka jingtohkit ka la ïaid,” la ong u SP ka West Garo Hills, u V.S. Rathore.