Washington, Jylliew:
U Ajay Banga, uba long u nong India uba la shong-sah hapoh America, ha ka Sngi Thohdieng u la shah thung kum u President jong ka World Bank ha kane ka por bad u la kylla long ruh u nong India ba nyngkong eh ban ioh bat ia ka shuki nongialam jong ki ar tylli ki tnat, kata ka World Bank bad ka International Mone-tary Fund (IMF).
Ha ka 3 tarik u Jymmang, ki Executive Director jong ka World Bank ki la jied ia u Banga, uba la don 63 snem ka rta, ban long u President uba 14 jong ka World Bank naka bynta ka samoi treikam kaba 5 snem kynthih.
Ha u Rymphang pat, la ong ba u President ka United States, u Joe Biden u la pynbna ba ka US kan sa thung ia u Banga kum u heh nongialam jong ka World Bank ha une u snem 2023.
Kumta, ha ka Sngi Thohdieng, ka World Bank ka la khot bad pynbna paidbah da kaba ong ‘wan iasnoh kti lang badngi ban pdiang sngewbha ia u Ajay Banga kum u President ba thymmai jong ka World Bank Group. Kane ka kynhun ka long ban rat dyngkhong ia ka jingduk- jingkyrduh na ka pyrthei’.
Kumjuh ruh ka Director jong ka International Monetary Fund (IMF), ka Kristalina Georgieva ka la ai khublei bad kitbok- kitrwiang ia u Ajay Banga halor katei ka jingioh lad jong u ban shim ia katei ka shuki nongialam jong ka World Bank ha kane ka kynti. Kumta ruh ka la ong ba, la ngeit skhem ba ka jingialam jong u kan wanrah ia ka jingiatrei lang kaba seisoh naka bynta kitei ki 2 tylli ki tnat khnang ba kan long ruh ka jingkyrkhu bad ka jingmyntoi naka bynta u duk- u rangli.
