Colorado, Jylliew:
U President ka United States (US) ha ka Sngi Palei u la pynbna ba shen ka Sweden kan sa ioh ban leit pyniasoh noh sha ka kynhun NATO. Katei ka jingpynbna jong u ka long hadien ki khynnah sngi ba ka US ka la pynpaw ba kan iaid lait ia ka jingpyrshah jong ka Turkey ban pynrung ia katei ka ri hapoh jong ka kynhun NATO.
Ha katei ka sngi, u Biden u la ai jingkren na Colorado Springs, Colorado, ha kaba u la maham ia kitei kiwei pat ki ri haba iadei bad ka jingma bad ki jingeh kiba ap ia ki na ki rukom leh jong ka China bad Russia ha kine ki sngi.
Ha ka Lah Sngi U Blei pat, u Biden ha ka jingiakren bad u President ka Turkey- u Recep Tayyip Erdogan, u la ai khublei ia u halor ka jingiakhun ilekshon biang jong u ha kane ka sien ka ban wan. U la ong ruh ba u Erdogan u dang beh hi ia ka thong ban pynïoh ia ka jingthrang jong ka Ankara ban thied ia ki liengsuiñ thma F-16 jong ka United States, hynrei u Biden u la kyntu pat ia ka Ankara ban weng noh ia ka jingpyrshah jongka halor ka jingpynrung dkhot ia ka Sweden sha ka NATO.
Haba ai jingkren ha katei ka sngi, u Biden u la ong ruh ba ka NATO ka long ka kynhun kaba khlaiñ haduh katta wat hapdeng ka jingpyrshang jong ka Russia ban pynpait pynpra ia ki dkhot jong ka, da kaba leit hiar thma ia ka Ukraine. Hynrei kane ka kynhun ka la nang khlaiñ bor shuh shuh da ka jingioh ban pynrung ia ki dkhot ba thymmai ha kine ki sngi kynthup ia ka Finland bad ka Sweden ka ban sa ioh ban long dkhot ba pura jong ka NATO.
Kumta, ha katei ka Sngi Nyngkong u Biden u la ong ba shen un sa leit ban iakren bad u Erdogan. Ka jingialang ba heh ba ka NATO ka la pynbeit ban pynlong, kan long hapoh Vilnius jong ka Lithuania ha une u Naitung u ban wan.
Ha ka Sngi Ba-ar, u Secretary of State jong ka United States, u Antony Blinken u la kyntu ia ka Turkey ba kan rai bha noh haba iadei bad ka jingpyrshah jongka ia ka jingpynrung dkhot thymmai ka NATO ia ka Turkey.
Hynrei ka White House ka la kyntait pat ia ka jingkynnoh ba u Biden u pynbiej bad pynkohnguh jubor ia ka Turkey da kaba kular ban phah ia ki liengsuiñ thma F16 jong ka US sha ka Turkey lada ka leh kumba la pynbeit da ka NATO.
Ha kajuh ka por ruh u Biden u la ong ba ka United States kan nym ailad ia ka China ban thaw ne wanrah jingeh wat hapdeng ka jingtrei shitom jong ka US ban pynskhem ia ka jingiadei para ri. Hynrei u la ong ruh pat ba ka US kam kwah ban pynmih daw iashrut bad ka China. Namar u la ong ruh ba ka China bad ka United States ki dei ban iaid ryngkat- ryngkat naka bynta ka bha ka miat bad ka jingmyntoi ia ka pyrthei baroh kawei.
Shuh shuh ruh u Biden u la pynpaw ia ka jingkwah jong ka US ban kyrshan ia ka Ukraine hapdeng ka jingiakhun thma jong ka bad ka Russia, kum shi bynta ban ai jingkyrshan ia ka Ukraine khnang ba kan lah ban iada ia la u jong u pud u sam na ka jingleit kyntur pud bad jingthombor dusmon jong ka Russia.
