Tang ban pyndap ïa ka ïing ka sem hap leit bylla sngi u Babu Birbor

“Nga dei u nonghikai ba la shah beh kam ba ka Sorkar MDA-I bad II ka kheiñ ïa nga kum u sohpyut jong ka.

Nongstoiñ, Jylliew 04:

Ka jingbeh kam noh jong ka Sorkar ïa ki 1200 ngut ki nonghikai ha ka Jylla, kaba la jia ha u snem 2021 ka la pynlong shisha ïa ki nonghikai ba kin mad ïa ka jingeh bad lehse kaba la ktah ruh ïa ka jingmut jingpyrkhat jong ki da kumno kin pyndap ïa ka ïing ka sem bad ban kyrshan la ki jong ki khun ki kti ha ki jingpule ki jong ki.

U Babu Birbor Riangtem na ka shnong Langdongdai, Nonglang Sirdarship, West Khasi Hills u dei uwei na ki nonghikai uba la shah beh kam ha ka Sorkar bad mynta tang ban pyndap ïa ka ïing ka sem u la hap ban leit phai sha ka kam bylla sngi .

Khyndiat shaphang u Babu Birbor, naduh u snem 2008 haduh 2010 u la hikai  ha ka Hima Nonglang U. P. School Langdongdai. Nangta ha u snem 2010, bnai Lber haduh 2014 bnai Jylliew u la hikai ha Porla Nongtrai U. P. School, West Khasi Hills bad u la hikai naduh u snem 2014 bnai Jylliew (14 tarik) ha ka Langdongdai Govt. L. P. School, West Khasi Hills. Pynban dei ha u snem 2021, bnai Kyllalyngkot, ma u lem bad 1200 spah ngut ki para nonghikai ka Jylla ki la shah beh kam ha ka Sorkar MDA-I.

“Nga dei u nonghikai ba la shah beh kam ba ka Sorkar MDA-I bad II ka kheiñ ïa nga kum u sohpyut jong ka. Kumta tang ban pynbiang ïa ki jingdonkam jong ki khun ki kti, ka ïing ka sem bad ïa ka met u la hap ban bylla sngi ban tur ïa ka dieng ka maw,” la ong u Babu Birbor haba kren bad u nongthoh khubor.

U la ong ba ym dei tharai tang ma u uba mad ïa katei ka jingeh, hynrei ki spah ngut ki nonghikai hapoh ka Jylla ki mad ïa kajuh ka jingeh ha kaba tang ban pynbiang ïa la ka jong ka ïing ka sem ki hap ban tur ïa ka dieng ka maw ban ïakhun dohïap tang ban im lem kumba kiwei ki im.

“Na ka liang jong ngi, ngi ïai ïaleh haduh mynta ban leit shakhmat ka Sorkar ban buh ka jingkyrpad na ka por sha ka por hynrei haduh mynta na ka liang jong ka Sorkar kam don kano-kano ka jingpynsngap bad ngeit skhem ha kawei ka sngi kan sngap watla ka la kheiñ makna ba ngi dei ki sohpyut ha ka imlang ka sahlang,” la ong u Babu.

U la ong ruh ba la ki phew snem u la don ha ki skul, hooid ka don ka jingshitom haba ki hikai ym tang ha skul hynrei wat ha ïing ruh namar u hap pyndep ïa kiba bun ki bynta na ka bynta ki khynnah. Hynrei u la lah ban bynta ïa ka jinglong ka mariang wat la u hap ban ïaid da ki kynta ban poi sha ki skul. Pynban kynsan-kynsan ha u 2021, ha bnai Kyllalyngkot ka Sorkar ka la beh kam noh.

Kumta u Babu u la pynpaw ka jingsngewnguh ïa ka imlang ka sahlang kiba ai ïa ka jingkyrshan na ka por sha ka por bad pynpaw ba ban bylla sngi ban ïaleh lem kumba kiwei ki leh na ka liang jong u, u la shem shitom namarba da ki phew snem u don ha ki skul mynta ka la ktah ïa ka jingmut jingpyrkhat.

“Wat la ngim lah shuh ka bor met ruh, haba ka mynsiem ka kwah ban pynim ïa ka ïing ka sem ban pynbiang ïa ki khun ki kti kiba pule da ka jingbym banse, ngi hap ban trei ïa ka kam bylla sngi ruh,” la ong u Babu Birbor.