Laussane, Jylliew:
Ka nongiakob mareh kaba tbit na Kenya ka Faith Kipyegon ka la lah mynta ban thaw ia ka rekod bathymmai ha ka pyrthei na ka jingiakob mareh 1,500m ki kynthei da kaba pyndep ha ka por 3:49.11. Katba u lahduh ha ka pyrthei u Fred Kerley u la khur ia ka jingjop napdeng ki shynrang ha ka jingiakob mareh 100m ha ka lympung ialehkai ba mynta ka 3rd Diamond Leauge Meeting jong ka aiom ialehkai kaba mynta.
Ha katei ka lympung ka Kipyegon ka la lah ban pynwandur bha ia ka rukom ialehkai la jan baroh ka rekod barim kaba da 3:50.07 ia kaba lah thaw mynshuwa da ka nong-ialehkai na Ethiopia ka Genzebe Dibaba ha u snem 2015.
Shuh shuh ruh katei ka nong-ialehkai na Kenya ka lah pyndep pura ia ki 29 snem jinglum jingjop da kaba bynrap ia ki ar jingjop ba ka khur na ka Olympic kata ka takma Ksiar ha ka 1,500m bad ka jingjop ba ka lah khur ha u snem 2017 bad 2022, ka Commonwealth Games da ka takma Ksiar na ka lympung baroh kawei ha u snem 2014 bad ka lai tylli ki khusnam jong ka Diamond League.
Kumjuh ruh u nongialehkai na USA u Fred Kerley, uba lah rah ia ka jingjop na Rabat ha ka taiew ba lah dep, u la khur mynta ia ka jingjop na ka jinglah jong u ban synshar ha ka jingialehkai da 9.94 sekhon, u Ferdinand Omanyala u lah wan ha ka kyrdan ba-ar da 10.05 ryngkat lang bad u Trayvon Bromell kum uba lai da 10.09 bad u nongialehkai na Jamaica u Yohan Blake u lah wan ha ka jaka ba hynniew. Kumjuh ruh u nongkhur takma Ksiar na ka Olympic u Jacobs um shym la shimbynta ha katei ka lympung na ka daw jong ki jingshitom.
Ha ka jingiakhun jong ki kynthei, ka nongialehkai na Ivory ka Marie-Josee Ta Lou ka la lah ban jam shakhmat ia ki diengpynkiang bad tam ia u lain ba khatduh ha ka 10.97 sekhon shakhmat ia ka nongialehkai na Germany ka Gina Lueckenkemper bad ka nong-ialehkai na Bilat ka Imani-Lara Lansiquot. Shuh shuh ruh ka Dina Asher-Smith kaba lah rah ia ka jingjop ha ka 200m ha Doha ha u snem 2019 ka lah weng noh na katei ka lympung ialehkai.
Nangta u nongialehkai na USA u Erriyon Knighton u la rah ia ka jingjop na ka 200m ha ka por 19.89, katba ka nongialehkai na Netherlands ka Femke Bol u la thaw ia ka rekod na ka 400m Hurdles da kaba tam shakhmat ia baroh ha ka por 52.43.
Nalor kata, u nongialehkai na USA u Grant Holloway u la lah ban pynpoi ialade sha ka jaka ba-ar ha ka lympung ialehkai ha Rabat da kaba khur ia ka jingjop na ka 110m Hurdles. Kumjuh ruh u nongialehkai na Spain u Mohamed Katir u la lah ban ialehkai bha na ka bynta ban khur ia ka jngjop ha ka 5,000m ha ryngkat bad ka jingtam shakhmat ia ka rekod ha ka pyrthei da 12:52.09.
