Delhi, Jylliew:
Namar ka jinglong jingman ba don mynta ha jylla Manipur, ka Union Public Service Commission (UPSC) ka la rai ban tyrwa da kiwei kiwei ki jaka thoh eksam lane ki ‘centre’ harum na ka bynta kito kiba ïakhun ha Imphal (Manipur) Centre ïa ka eksam Enforcement Officer/Accounts Officer bad Assistant Provident Fund Commissioner, 2023 ban long ha ka 2 tarik Naitung, 2023:
Ki jaka ïakhun eksam ba ka UPSC ka la tyrwa na ka bynta kitei ki eksam ki kynthup ïa ka nongbah Aizawl, Kohima, Shillong, Dispur, Jorhat, Kolkata bad Delhi. Ka lad ban pynkylla ïa ki ‘centre’ ne ka jaka thoh eksam kan don na ka bynta ki kyrtong jong ka Imphal Centre lyngba ka lad Interactive Voice Response System (IVRS). Na ka bynta kane yn phah ïa ka jingtip sha man ki kyrtong ha u/ka mobile nombar jong ki bad ka Commission. Ki kyrtong ki dei ban pyndonkam ïa u mobile nombar ba la rejister ban ïoh ïa kane ka lad lyngba ka IVRS.
Shuh shuh, ki kyrtong ki lah ruh ban phone sha ka UPSC ha kine ki nombar phone harum 23070641, 23381073, 23384508 & 23387876 naduh ka por 12 baje shiteng sngi jong ka 2 tarik Jylliew, 2023 haduh 5:00 janmiet jong ka 12 tarik Jylliew, 2023. Kine ki telephone nombar kin treikam naduh ka por 12 baje shiteng sngi jong ka 2 tarik Jylliew, 2023 haduh 5 baje janmiet jong ka 12 tarik Jylliew, 2023. Ki kyrtong ki lah ruh ban phone hapdeng ka por 9:30 mynstep haduh 6:00 baje janmiet ha katei ka por.
Shuh shuh, ka lad ban pynkylla ïa ki ‘centre’ na ka bynta kum kine ki kyrtong ka don ruh ha ka ‘website’ jong ka UPSC naduh ka por 12 baje shiteng sngi jong ka 2 tarik Jylliew, 2023 haduh 5 baje janmiet jong ka 12 tarik Jylliew, 2023 baroh arphew saw kynta.
Halor ka jingïoh pdiang ïa ki lad ban pynkylla ïa ki ‘centre’ na ki kyrtong lyngba kano kano ka rukom ba la kdew haneng, yn buh ïa ki ha ki jaka ba ki la jied bad kumta yn pyllait ïa ki e-Admit Card jong ki. Yn phah ïa ka jingpyntip ban pynthikna ka jingpynkylla ïa ki ‘centre’ sha man kine ki kyrtong ha u mobile nombar jong ki. Lah ban download ïa ki e-Admit Card na ka ‘website’ jong ka UPSC.
