Aizawl, Jylliew:
Ka Sorkar Mizoram ha ki khyndiat sngi kiba la leit noh ka la kam ba ka dang don hapdeng ka jingïai ap ban ïoh ïa ka jubab na ka Sorkar Assam halor ki mat kiba ïadei bad ki mat kam jaka jong ka sorkar Assam ha kaba ïadei bad u pud u sam hapdeng ki 2 jylla.
La ïathuh ba na ka liang ka sorkar Mizoram ka la dep ban leit ai ïa ka kaiphod halor ki mat kam jaka ha u bnai Rymphang, 2023.
Kat kum ka kyrwoh ba la pyllait na ka tnat Kam Pohïing jong ka sorkar Mizoram la ïathuh ba kumba la ïa mynjur ha ka jingïalang kaba la pynlong ha u Naiwieng jong u snem ba la dep, na ka liang ki arliang sorkar ki la leit ban pynlong ïa ka jingsorjamin jaka ha ki thaiñ khappud bad na ka liang ka sorkar Mizoram ka la dep ruh ban leit ai ïa ka kaiphod halor ki mat kiba ïadei bad ka jingkam ïa ki jaka khappud. Ka tnat sorkar ka la pyntip shuh shuh ba ha ka jingïalang la pynmih ïa ka rai ba ka sorkar Assam ka dei ban pynbiang ïa ka kaiphod ha u bnai Ïaïong lane ha u bnai Jymmang jong une u snem ba mynta; hynrei tad haduh kane ka kynti kaba mynta na ka liang ka sorkar Mizoram kam pat shym la ïoh satia ïa kano kano ka jubab na ka sorkar Assam.
Na ka liang ka tnat sorkar ka la pyntip ruh ba tad haduh kane ka kynti kaba mynta ym pat shym la pynbeit satia ïa ka tarik na ka bynta ban pynlong sa ïa kawei ka jingïalang pynbeit pud.
Ka tnat kam pohïing jong ka sorkar Mizoram ka la pyntip shuh shuh ba ha ka jingïalang pynbeit pud kaba la pynlong ha ka 17 tarik u Naiwieng, baroh arliang ki sorkar jylla ki la pynmih ïa ka rai ba ka Mizoram kan pynbiang ïa ka thup kyrteng jong ki shnong ki jaka, ki pud ki sam bad kumjuh ruh halor ki mat kiba ïadei bad ki kynhun nongshong shnong kiba shong ba sah ha ki thaiñ khappud bad don hapdeng ki jingïakajia bad la rai ba ka sorkar ka dei ban pynbiang ïa ka kaiphod hapoh ki lai bnai.
La rai shuh shnuh ba ïa ki jingkam jaka yn sa khmih bniah pin pa bin da ki ‘regional committee’ na ki arliang jylla khnang ban pynpoi sha ka rai kaba bha tam ban pynbeit ïa ki kam ïakajia khappud. Kum ban shu ïathuh hangne, ka jylla Mizoram ka don ïa ka lynter khappud kaba jngai haduh 164.6 km bad ka jylla Assam.
Ka jingïakajia khappud hapdeng kitei ki 2 tylli ki jylla ka la wanrah ruh ïa ka jingïaumsnam kaba shyrkhei ha u Naitung jong u snem 2022 ha kaba ki la don haduh 6 ngut ki pulit Assam bad uwei u riew paidbah kiba la khlad hadien ka jingmih jong ka jingïasynreit kuli kaba jur hapdeng ki pulit Assam bad Mizoram. Ha katei ka jingjia, ki la don ruh palat 60 ngut ki briew kiba la ïoh ïa ki jingmynsaw.
