Agartala, Jylliew:
Ka tnat pulit jong ka jylla Tripura ka la pyntip ba ha ka 4 tarik mynta u bnai ki la don haduh 6 ngut ki dkhot jong ka seng kieng atiar National Liberation Front of Tripura (NLFT) kiba la wan ban pyndemwait noh ïalade hakhmat ki bor pahara jong ka jylla.
Kat kum ka jingpyntip jong ka tnat pulit, ka la ïathuh ba kitei ki 6 ngut kiba la wan ban pyndemwait ha katei ka sngi ki dei ki samla kiba dang shu leit ban ïasoh bad ka seng NLFT. Ki 6 ngut ki dkhot jong ka NLFT ki la leit ban pyndemwait noh ïalade hakhmat ki bor pahara jong ka tnat shipai Border Security Force (BSF), Tripura.
Ki 6 ngut ki dkhot ka NLFT kiba la wan ban pyndemwait ha katei ka sngi ki kynthup ïa u Ramanjoy Tripura, Khorsamohan Tripura, Madan Mohan Tripura, Alajoy Tripura, Meturam Tripura bad u Barmita Tripura. Baroh kitei ki 6 ngut ki dei ki nongshong shnong ka thaiñ Wakhiram Roajapara bad Thalcherra – ki thaiñ kiba don ha Dhalai district jong ka Tripura.
Kat kum ki jingïoh lum jingtip la ïathuh ba kitei ki dkhot ka NLFT ki la wan ban pyndemwait noh ïalade lyngba ka jinglah jong ka tnat shipai ban ïasyllok bad pynsngewthuh ïa ki; bad kumjuh na ka jinglah ban kyrpad ïa ki ba kin wan ban phai biang sha ka lynti jong ka jingsuk khnang ba kin lah ban pynsdang biang ïa ka jingim kaba thymmai kaba dei na ka bynta ka bha ka miat bad ka shong suk shong saiñ jong ka imlang sahlang.
