Shillong, Jylliew 05:
Ki khlur nongïalympat kiba kynthup ïa ka Sakshi Malik, Bajrang Punia bad ka Vinesh Phogat ha ka Lah Sngi U Blei ki la kyntiat mardor halor ki khubor ba ki la ai jingmut ban weng noh na ka jingïakhih pyrshah ïa u nongïalam ka WFI u Brij Bhushan Singh, hynrei ki la bynrap da kaba kin ïai bteng ban ïakhun tad haduh ban da ïoh ïa ka rai kaba hok.
Hynne ka sngi ki la mih shibun ki khubor kiba la kam ba kitei ki nongïalympat ki la weng noh na ka jingïakhih bad ki la leit bteng sha la ka kam hadien ka jingïalang bad u Myntri ki kam pohïing ka Sorkar Pdeng u Amit Shah ha ka sngi Saitjaiñ.
Hynrei kitei ki nongïalympat ki la ai jingpynshai da kaba ong ba ki la bteng ïa ki kam Officer of Special Duty (OSD) hapoh railways, hynrei ki la ong ba ki long tang ki khubor hamsaïa halor ka jingai jingmut ban pynkut noh ïa katei ka jingïakhih.
Kat kum ki khubor, kitei ki nongïalympat ki la bteng ban leit phai sha la ki kam naduh ka taiew ba la lah.
Kat kum ki khubor ki la paw hapoh ki rynsan social media, ka Sakshi bad u Bajrang kim shym la weng na katei ka jingïakhih bad kin ïai bteng tad haduh ban da ïoh ïa ka hok.
“Ngi la ïakynduh u Myntri ki kam pohïing u Amit Shah ha kaba ka jingïakren ka la long kaba shai. Ki don tang kawei ka jingdawa bad kata ka long ban kem ïa u Brij Bhushan Singh. Ngam shym la sangeh na ka jingïakhih bad nga la bteng ïa ka kam ka jong nga kum u OSD hapoh Railways.
“Nga kwah ban pynshai ba ngin ïai bteng ban ïakhih tad haduh ban ïoh ïa ka hok. Ngin ym kynran dien. Ka khynnah kynthei kam shym la shim noh ïa ka FIR kine baroh ki dei kiba shu pynthame bad kim long kiba shisha,” la ong ka Sakshi.
“Ki khubor kiba pynpaw ba ngi la weng noh ïa ka jingïakhih ki dei tang ki khubor hamsaia. Kine ki khubor ki la saphriang tang ban pyntieng ïa nga namar ngim pat shym la weng na ka jingïakhih. Ki khubor ba ka khynnah ïalehkai ka la shim noh ïa ka FIR ka long kaba bakla. Ka jingïakhun kan dangïai bteng tad haduh ban da ïoh ïa ka hok,” la ong u Bajrang.
Ki khlur nongïalympat kiba kynthup ïa u Bajrang, Sakshi bad ka Vinesh Phogat ki la long napdeng kiwei pat kiba la dawa ban pynshitom ïa utei u khlieh duh ka WFI u Brij Bhushan Sharan Singh halor ka jingshah kynnoh don kti ha ban jrong kti ïa ki khynnah kynthei.
Dangshen ha ka 28 tarik u Jymmang, kitei ki nongïalympat ki la shah kem ha ki pulit ka nongbah Delhi. Hadien kitei ki khlur ïalehkai ki la leit sha Haridwar da kaba kam ba kin pynngam noh ïa ki takma ha ka wah Ganga. Hynrei lyngba ka jingkyrpad na kiba bun, ki la rai ban bat biang ïa kitei ki takma ba ki la khur jingjop.
Na ka liang ki pulit ka Delhi ki la pynrung kyrteng ïa ar tylli ki jingujor ejahar pyrshah ïa u Brij Bhushan kaba kynthup ruh ïa ka jingujor na u kpa jong kawei ka khynnah ïalehkai ban pynngat ha ka Protection of Children from Sexual Offences (POCSO) Act ka ban long haduh hynñiew snem.
