South Korea, Jylliew:
Na ka lympung ialehkai kaba la long mynta ha Yecheon ka Asian U20 Athletics Championship uwei na ki nongialehkai kawang sum ka ri uba lah ioh ban shimbynta ha ka lympung u Shivam Lohakare, u lah khur shalade ia ka jingjop ha ryngkat bad ka takma Rupa hadien ka jinglah ban kawang ia u sum ha ka jingjngai kaba 72.34m, katba u Mohit Chaudhary u lah wan ha ka jaka ba hynniew hadien ba ka jnglah jong u ban kawang ia u Sum ha ka jingjngai kaba 62.72m.
Haba phai sha ka jingiakob mareh 800m, u Shakeel ka ri u lah khur shalade ia ka takma Rnong ha ryngkat bad ka por ialehkai kaba biang tam eh jong ka aiom ialehkai ba mynta da 1:49.79. Ha katei kajuh ka rynsan ialehkai, u Shyam Malik u lah pyndep ruh ia ka kam ialehkai ka jong u ha ka por 1:51.30 na ka bynta ban long uba san ha ka jingiakhun. Kumjuh ruh u Sharuk Khan u lah pyndep ha ka por 8:51.74 na ka jingiakob 3000m Steeplechase ki shynrang na ka bynta ban khur pat sa kawei ka takma Rupa.
Ha ka jingialehkai kynhun ha ka Mixed 4x400m Relay, ka kynhun ialehkai ka ri ka la lah ban khur shalade ia ka takma Rnong da kaba pyndep ha ka por 3:30:12. Kumjuh ruh ka Heena Mallick ka lah pynioh ia ka takma Ksiar ba nyngkong sha ka ri na ka jingiakob mareh ki kynthei ha ka 400m, ha kaba ka Mallick ka lah pyndep ia ka jingiakhun ha ka por 53.31 sekhon.
Kumjuh ruh u Bharatpreet Singh u lah pynioh pat sa kawei ka takma Ksiar sha ka ri na ka jinglah jong u ban Kawang jngai da 55.66m ha ka jingiakob kawang Discus ki shynrang katba ka Antima Pal ka lah pynioh ia ka takma Rnong sha ka ri na ka jingiakob mareh ki kynthei ha ka 5000m, kaba long ruh ka takma ba nyngkong ba ka ri ka lah khur na ka lympung hadien ba ka tei ka nongialehkai ka la lah ban pyndep ia ka jingiakhun jong ka ha ka por 17:17.11 sekhon kum ka jingpynthikna halade ba ka pyndep ia ka jingiakhun ha ka kyrdan balai.
