Shillong, Jylliew 05:
Ki pulit pynïaid kali haduh ka por 11 baje mynstep jong ka 5 tarik u bnai Jylliew kim pat ïoh hukum na ki bor ba halor ban khang ïa ki kali kiba dei ‘Odd’ ban ïaid na Ïingkashari ter-ter sha Khyndailad bad shaduh Motphran kumba la pynbna na ka shlem treikam ka Deputy Commissioner (DC) ka East Khasi Hills District.
Kum ban shu pynkynmaw, na ka liang ka DC ka la pynmih ïa ka hukum ha ka 1 tarik u bnai Jylliew 2023 ban pyntreikam noh da ka ‘Odd-Even’ naduh ka 5 tarik u Jylliew ïa ki kali kamai kiba ïaid na ïingkashari sha Khyndailad bad shaduh Motphran namar ka jingjur palat ka jingkhapngiah bad ka jingdheng kali ha kitei ki thaiñ.
Wat la ka jingsdang ban pyntreikam ïa katei ka hukum ha katei ka sngi ka long ba tang kali kiba don ïa u ‘Odd Number’ kiba kut ha u 1,3,5,7 bad 9 ki lah ban kamai ha katei ka sngi hynrei la sakhi ba na ka liang ki nongñiah kali kamai kiba kut ha u ‘Even Number’ kata 0,2,4,6,8 ki la mih ban kamai beit kumba ju long barabor bad na ka liang ki pulit pynïaid kali ruh ha katei ka sngi ki la bunkam ban pynïaid kali ha Motphran bad ha Khyndailad haba ïaid ki kali kamai.
Haba ïoh ban ïakren bad ki katto-katne ngut ki nongkamai kali na kitei ki thaiñ kiba kut ha u ‘Even Number’ , ki la ong ba kiba bun hi ki para nongñiah ki la mih ban kamai namar ban shu shong ha ïing kin ym ïoh satia ban bam bad ban bsa la ka ïing ka sem.
Kitei ki nongñiah kali kamai ki la ïathuh ba na ka liang ki pulit pynïaid kali ki khlem ong eiei bad ki la ong ba lada ki pulit pynïaid kali ki bat ïa ki, kin hap ban sangeh noh hynrei ban shu shong ha ïing ka long kaba eh bad kaba jynjar ban pyndap ïa ka bai bam ha ïing ha sem.
“Ban shong ha ïing ngin ïoh bam naei keiñ namar ngi bylla mynsngi bad ngi bam mynmiet, ka long kaba jynjar,” la ong kitei ki nongñiah kali kamai.
