Shillong, Jylliew 05:
Ka synjuk ïalehkai jong ka Megha-laya State Volleyball Association (MSVA) ka la kyntu ïa ka Meghalaya State Olympic Asso-ciation (MSOA) ba kan ai jingithuh noh ïa ka khnang ba kan jam shakhmat ïa ka jingpynkhreh na ka bynta ka 5th Meghalaya Games ka ban long mynta u snem ha Tura, West Garo Hills.
Kane ka kynhun hapoh ka jingïalam u MLA ka South Shillong u Bah Sanbor Shullai bad uba long u President katei ka synjuk ha ryngkat u Bah P.T Passah, Working President, Bah K.V Kharlyngdoh, Vice President, Bah Gilbert Laloo, Asst Secretary ka MSVA bad kiwei ki dkhot ki la leit ïakynduh ïa u Bah John F. Kharshiing, Working President ka MSOA ha ka Lah Sngi U Blei ha ka shlem treikam jong ka MSOA kaba don ha JN Stadium, Polo.
Dangshen ha u bnai ba la dep, ka MSOA ha ryngkat u Myntri ka tnat Ïalehkai u Bah Shakliar Warjri ha ka jingïalang kaba la long ha Tura, ki la rai ban ithuh noh ïa ka jingïalehkai Volleyball bad ka Sport Climbing ba kin ïoh ïashim bynta ha Meghalaya Games naduh mynta u snem.
Kitei ki nongïalam ka MSVA ki la ïakynduh ruh ha ka taïew ba la dep ïa u Bah Finely L. Pariat, General Secretary ka MSOA.
Na ka liang u Working President ka MSOA u la pynsngew ba u General Secretary u la pyntip ba ynda ka kynhun MSVA ki la lah ban pynbiang lut ïa baroh ki kot ki sla sha ka shlem treikam ka MSOA khnang ba kin leh ïa kaba donkam. Ha katei ka jingïasyllok la don lang u Bah P.B War Nongbri, Asst Director, DSYA bad kiwei. La ïasyllok ruh kumno ka long kaba donkam ban ïoh ïa ka Volleyball Association kaba khlaiñ hapoh ka Jylla namar kumba ka paw ki don bun ngut ki nongïashim bynta ha kane ka jingïalehkai volleyball.
