Shillong, Jylliew 05:
Ka shlem treikam u District Sports Office (DSO) bad ka West Jaiñtia District Sports Association ha ka 3 tarik u Jylliew ki la pdiang burom ïa ki nongïalehkai Athletic kiba wan ïashim bynta ha ka Chief Minister’s Inter School Athletic Meet 2023, ba la pynlong da ka tnat ïalehkai ha SAI Training Centre kaba ha NEHU.
Ha kane ka lympung, ka West Jaiñtia Hills District ka la rah ïa ka nam lahduh hadien ba ïoh khur haduh 23 tylli ki takma ba kynthup 14 tylli ki takma ksiar, 6 tylli ki takma rupa bad 3 tylli ki takma rnong.
Ka West Jaiñtia Hills ka la rah ruh ïa ka nam nongjop ha ka U-16 jong ki khynnah shynrang hadien ba ïoh ban khur 15 tylli ki takma ba kynthup 9 tylli ki takma ksiar, 5 tylli ki takma rupa bad kawei ka takma rnong. Katba na ka liang ki kynthei ka la wan ha ka kyrdan ba-ar hadien ba ïoh khur 8 tylli ki takma ba kynthup 5 tylli ki takma ksiar, 1 tylli ka takma rupa bad 2 ki takma rnong.
Ka Himonki Khaii kaba ïalehkai ha ka Under-18 ka la ïoh rah ruh ïa ka nam ba kynsai tam ha kane ka lympung.
La pdiang burom ïa kine ki nongïalehkai kynthei bad shynrang kaba sdang na Challam Syngkon Petrol Pump da ki dkhot jong ka WJDSA bad ka shlem treikam u DSO bad pynbud da ka jingïaid kjat na kane ka jaka haduh ka madan Kiang Nangbah Stadium ha kaba la pynlong ïa ka jingïalang pdiang burom ïa ki.
Ïa ka jingïalang la pynïaid da u Vice President WJDSA, u Bah Patrick Lamare ha kaba la ïoh ïa ki kyntien sngewnguh, ïaroh bad ai mynsiem ïa ki ba kin dangïai trei shitom nangne shakhmat ha ka kam ïalehkai.
La ioh ruh ïa ki kyntien sneng kyntien kraw na u General Secretary ka WJDSA u Bah Lammat oo Laloo, na u dkhot ka WJDSA Bah S.K Lato, Working President Bah EMH Passah bad na u Assistant Director Bah Khroobok Passah u ba dei ruh u DSO jong ka West Jaiñtia Hills District.
