Paris, Jylliew:
Ka khlur ialehkai Tennis na ka ri Belarus ka Aryna Sabalenka ka lah jam mynta sha ka rynsan iakhun quarterfinal jong ka lympung ialehkai French Open, ha kaba katei ka nongialehkai kan pynkhreh ialade na ka bynta ka jingiakynduh pyrshah bad ka nongialehkai na Ukraine ka Elina Svitolina.
Kumta ruh ha kaba iadei bad katei ka bynta jong ka jinglah jong ki ban jam sha katei ka rynsan ialehkai ha ka lympung, ka khubor ka iathuh ba Aryna kaba long ka lahduh Australian Open bad kaba bat ia ka kyrdan ba-ar ha ka pyrthei ka la lah ha ka ban pynliem noh ia ka Sloane Stephens da 7-6 (7/5), 6-4 na ka bynta ban jam sha katei ka rynsan ha ka lympung ha ka sien kaba nyngkongeh. Kumta ruh ka jingiakynduh ia aireng kitei ki arngut kan long mynta ka sien kaba lai, hynrei kaba nyngkong naduh ba ka Russia ka lah hiar thma ia ka Ukraine naduh u snem ba lah dep.
Kumba ka paw haduh mynta ka long ba ka Svitolina ka lah dep ban iakhun pyrshah bad arngut ki nongialehkai na Russians bad kaba lah kyntait ruh ban iakhublei-kti namar jong ka thma. Shuh shuh ruh ka Sabalenka ka lah pynliem ruh ia ka Marta Kostyuk ha ka kylla iakhun ba nyngkong jong ka lympung. Kumta ruh ka Kostyuk ka lah shim ia ka rai na ka bynta ban ym iakhublei-kti kaba lah wanrah ia ka jingshah kynshi-kynew ha ki paidbah kiba lah wan sakhi ia ki jingialehkai ha ka lympung.
Kham ha shuwa, ka Svitolina kaba ialehkai ia ka lympung iakhun Grand Slam ha kaba nyngkong eh mynta naduh ba ka lah shim ia ka jnglong-kmie, ka lah jam mynta sha katei ka rynsan iakhun ha ka sien kaba saw ha ka kam ialehkai ka jong ka, ha kaba katei ka nongialehkai na Ukraine ka la lah ban pynliem noh ia ka Daria Kasatkina da 6-4, 7-6 (7/5) na ka bynta ban khur ia ki hynniew jingjop ha ki hynniew sien iakynduh jong ka pyrshah ia katei ka nongialehkai na Russia kaba lah jam sha ka jingiakhun semifinal ha u snem ba lah dep jong ka lympung.
