Singapore, Jylliew:
Ka khlur ialehkai Badminton ka ri kaba dang iai bat kum ka lahduh ka PV Sindhu ka pynkhreh mynta ban wanphai biang sha ka jing-ialehkai bha ka jong ka hadien ba kam shym la lah ban ialehkai bha ha ka Thailand Open bad ruh ba u khlur ialehkai ka ri napdeng ki shynrang u HS Prannoy un iai phrang shuh shuh ialade ha ryngkat bad ka jingskhem jingmut naba ki arngut ki long ki nongialehkai ba nakhmat jong ka kynhun ialehkai ka ri ki ban ia aireng mynta ka Singapore Open Super 750 tournament ka bas dang mynta ka sngi Ba-ar.
Kiei kiei baroh kim shym la long kumjuh na ka bynta ka Sindhu naduh ba ka lah mad ia ka jingshitom ha ki bynta jong ka kjat jong ka ha u Nailar 2022. Hynrei ka long kaba suki na ka bynta ban wanphai biang sha ka kam ialehkai ba seisoh ka jong ka da kaba ioh ruh shaduh ka jingiakhun phainal bad semifinal jong ka Madrid Spain Masters & Malaysia Masters ruh kumjuh ha ka aiom ialehkai kaba mynta.
Kumjuh ruh ka jingshah pynwai kloi jong ka na ka lympung ba dang shu dep ka Thailand Open hadien ka jingshah pynrem da ka said ha ka nongialehkai na Canada ka Michell Li kam shym la long ka lynti ba dei na ka bynta ban tyrwa ialade hakhmat ka lympung kaba iaisah kum ka khusnam BWF world tour ba khatduh na ka bynta katei ka nongialehkai. Kumta na ka bynta kata ka jingiaid lyti jong ka ha la lympung, katei ka nongialehkai kan pynkhreh bha ialade na ka bynta ka jingiakyhduh nyngkongeh bad kaba na Japan ka Akane Yamaguchi.
Na ka bynta ka jingiaid lynti jong u Prannoy ha ka lympung, ka khubor ka iathuh ba utei u nongialehkai un plie ia ka jynkhang jong u sha ka lympung da kaba iakynduh nyngkongeh shuwa bad u nongialehkai na Japan u Kodai Naraoka. Na ka liang jong u Lakshya Sen ruh kumjuh u don ia ka jingkyrmen na ka bynta ban ioh rung sha ka lympung, hynrei uba lah ieng hakhmat jong u mynta ha ka jingpyniakab u long u nongialehkai na Chinese Taipei u Chou Tien Chen. Shuh shuh ruh u Kidambi Srikanth un pynkhreh ban ia aireng ha ka lympung bad u nongialehkai na Thailand u Kantaphon Wangcharoen katba u nongkhur jingjop ha ka Orleans Masters u Priyanshu Rajawat un iakynduh shuwa bad u nongialehkai na Japan u Kanta Tsuneyama.
Ha ka jingiakhun paramarwei jong ki kynthei, ka Saina Nehwal kan pynkhreh ia ka jingiaid lynti ba nyngkong jong ka bad kaba na Thailand ka Ratchanok Intanon; ka nongiakhun pyrshah jong ka Saina kaba lah mad ia ka jingshah pynrem ha ki snem ba lah leit noh.
Na ka jingiakhun jong ki shynrang ha ka kyrdan ba mar arngut, u Chirag Shetty & Satwiksairaj Rankireddy kiba long ki nongialehkai ka ri kiba lah rah ia ka nam lahduh ha u snem ba lah dep na ka French Open Super 750, kin sdang ia ka jingiaid lynti jong ki ha katei ka lympung ba mynta bad u nongialehkai na Japan u Akira Koga & Taichi Saito, katba u MR Arjun & Dhruv Kapila kin iakhun nyngkongeh shuwa bad ki rangialehkai na France u Lucas Corvee & Ronan Labar.
Na ka jingiakhun mar arngut ki kynthei, ka Treesa Jolly & Gayatri Gopichand kin pynkhreh bha ialade na ka bynta ka jingiakhun ba nyngkong bad ki thei ialehkai na Hong Kong ka Yeung Nga Ting & Yeung Pui Lam.
