Paris, Jylliew:
U nongialehkai Tennis na Spain uba bat ia ka kyrdan ba nyngkong ha ka pyrthei u Carlos Alcaraz u la lah mynta ha ka ban pynliem noh ia u Lorenzo Musetti da 6-3, 6-2, 6-2 na ka bynta ba un jam pat sha ka rynsan iakhun quarterfinal jong ka French Open ba mynta bad ha kaba u Carlos u lah nangjan shuh shuh shakhmat na ka bynta ban ioh ia aireng pyrshah bad u khlur ialehkai na Serbia u Novak Djokovic.
Kumta ha ka jingialehkai hapdeng kitei ki arngut, u Alcaraz u lah khyrwit haduh 42 tylli ki jingjop bad ioh pynkhein dor-thong haduh hynniew sien da kaba pynlong ruh ia utei u nongialehkai na Italy ban mad noh ia ka jngshah pynrem ka jong u; uba lah rah ia ka jingjop na ka lympung ha u snem ba lah dep. Kumjuh ruh u Carlos uba dang iai long u nongjop ha ka US Open, u lah dep ban khur ia ki 11 jingjop ha ki jingialehkai Grand Slam ki jong u bad uba lah jam mynta shakhmat sha katei ka rynsan iakhun na ka bynta ka sien kaba ar jong u snem ba mynta.
Hadien katei ka jingjop, u Carlos 20 snem ka rta un hap ban pynkhreh bha ialade na ka bynta ka jinglah jong u ban iakynduh la bad uba wan ba-ar ha ka lympung jong u snem 2021 u Stefanos Tsitsipas ne bad u nongialehkai na Australia u Sebastian Ofner. Shuh shuh ruh u Alcaraz u lah iai janai shuh shuh mynta sha ka 34-3 na ka bynta ka aiom ialehkai ba mynta bad mynta u sah sa kawei ka jingjop ba un khur na ka jinglah jong u ban ioh iakynduh bad u nongkhur nam lahduh arsien na ka tei ka lympung ialehkai u Novak Djokovic ha ka jingiakhun semi final jong katei ka lympung ialehkai ba mynta.
