Lucknow, Jylliew:
Katkum ka khubor ba lah ioh lum ka iathuh ba u Digvijay Chautala u lah shah jied mynta kum u nongialam bahakhliehduh uba thymmai jong ka synjuk Handball Association of India (HAI) bad u Jagan Mohan Rao kum u Secy. Genl jong u.
Kumta ha kaba iadei bad katei ka kam, ka khubor ka iathuh ba ka jingialeh baroh shi katta na ka bynta ban nang iai kyntiew ia kata ka jait jingialehkai ka lah poi mynta sha ka bynta kaba lah ban seisoh biang sa shisien hadien ba ka synjuk baroh kawei mynta ka lah ioh da utei u nongialam ba thymmai hadien ba ka synjuk ka lah dep ban mad ruh ia ka jingshah tuklar ha ka Indian Olympic Association.
Ka khubor ba lah ioh lum ka iathuh ruh ba naduh mynta ka Handball Federation of India (HFI) bad ka Handball Association India (HAI) ha ka jingiadonlang ruh ka nongialam bahakhliehduh jong ka Indian Olympic Association ka PT Usha ki lah shim ia ka rai na ka bynta ban iatyllilang kawei na ka bynta ban wanrah bad kyntiew shuh shuh ia ka jingialehkai bad kaba lah jied ruh mynta ia u Digvijay Chautala kum u nongialam ba thymmai jong ka HAI. Kumta kitei ki lai kynhun ki lah shim ruh ia ka rai na ka bynta ka jingiatreilang ka jong ki na ka bynta ban iai pynbha bad pynjanai shuh shuh ia katei ka jait jingialehkai ha ka ri India baroh kawei.
Kumta na ka liang jong ka HAI ka lah ai khublei ruh ia ka IOA halor ka jingpyntyllun jong ka ia ka kam ba ka dei ban leh na ka bynta ban pynkut noh ia kiei kiei ki jingiakynad ba lah mih bad kaba lah buh ruh ia ka jingkyrpad na ka bynta ka jingiatreilang.
Kumta ka long kaba donkam bha mynta na ka bynta ban pynkut noh ia kino kino ki jingiakynad, naba ka long kaba donkam bha ia ka kynhun ialehkai jong ka ri ban pynkhreh bha ha kaba iadei bad ka jingshimbynta ha ka lympung ialehkai Asian Games mynta u snem ha Hangzhou.
