New Delhi, Jylliew:
Ka synjuk pyniaid jingialehkai Boxing ka ri Switzerland ka Switzerland Boxing Federation (SBF) ka lah pynbna khubor ha kaba iadei bad ka rai na ka bynta ban mih noh na ka International Boxing Association (IBA) na ka bynta ba kan leit pyniasoh pat bad kawei ka synjuk kaba dang thymmai ka World Boxing Association.
Kumta ha kaba iadei bad katei ka bynta, katei ka synjuk na Swiss ka lah pynkut noh ia ka jinglong dkhot ka jng ka da kaba pynpaw ruh ia ka rai jong ka International Olympic Committee (IOC) na ka bynta ban sloit noh ia ka IBA na ka hok jong ka na ka bynta ba kan pynlong ia kino kino ki lympung ialehkai ha ka Olympic 2024 ha Paris, kaba kynthup ruh ia ki lympung na ka bynta ban jied ia ki kynhun ialehkai bapher bapher ban phah sa katei ka lympung ka ban sa long ha Paris.
Katei ka jingpynbna jong ka SBF ka wan shiphew sngi hadien ba ka IBA ka lah sospon noh ia ki saw tylli ki Federation na ki ri bapher bapher kata na ka ri New Zealand, Germany, Netherlands bad Sweden na ka daw jong ka jingshimbynta ka jong ki ha ka World Boxing.
Kumta ka Swiss Boxing Association Council ka lah shim mynta ia ka rai na ka bynta ban weng noh ialade na ka IBA bad ban pyniasohnoh bad kata ka synjuk ba thymmai. Kumba ka paw hi ka long ba ka Switzerland ka long napdeng kiwei pat ki ri kaba lah sangeh ha ka ban pynlong ia ki rynsan ialehkai jong ka IBA mynta u snem halor ka rai ba ka IBA ka lah shim na ka bynta ban shah bad ailad noh ia ki nongiakura na ka ri Russia bad Belarus ba kin ia aireng ha ki lympung.
Kaba kham haswhua jong une u snem ba mynta, ka kynhun jong ki ri bapher bapher kaba kynthup ia ka ri USA bad ka ri Bilat ki pynbna ia ka jingthaw thymmai mynta ia ka synjuk ia kaba lah tip kum ka ‘World Boxing’ da ka jingkyrmen ha ka jngpynthikna ia ka jingnang iai bteng shuh shuh ka kam ialehkai jong katei ka jait jingialehkai ha ka prokram ba pura jong ka Olympic. Ka ri Switzerland ka kylla long mynta ka National Federation kaba ar ban pynbna paidbah halor ka jingweng noh ka jong ka ia ka jnglong dkhot na ka IBA hadien ba ka USA ka lah pyniasohlang ialade bad katei ka synjuk ba thymmai.
Katei ka rai ka lah ban wan sha ka jingpyntreikam ia ka ha ka jingialang kaba heh ka ban sa long pat jong ka synjuk pyniaid jingialehkai Boxing ka ri Swiss. Hynrei na ka liang jong ka IBA ka lah iathuh ruh ba katei ka synjuk ka lah pynkhein ruh ia ki kyndon ki jong ka kumba ka lah dei ban buh da kaba donkti mynta ha ki kam sain-pyrthei (Politics) ha ka kam ialehkai; khamtam eh katkum ka Article 4.
