Shillong, Jylliew 05:
Ka lahduh jong ka Shil-long Premier League, ka Mawlai SC kan ïakhun pyrshah ïa ka Khlieh-mawlieh Youth Club, katba ka Rangdajied United FC kan ïakynduh pyrshah ïa ka lahduh jong ka MSL 2019, ka Shillong Lajong ha ka semi final jong ka Meghalaya State League 2023, la pynbna ka Tour -nament Committee hadien ba la pynlong ïa ka jingïakap ha ka janmiet jong ka Lah Sngi U Blei.
Ïa kine ki jingïakhun semi final yn pynïalehkai ha ïing bad shabar (home-and-away), ka ban long ha 10 tarik mynta u bnai bad ïa ka wat ba ar yn pynlong ha ka 13 tarik. Ïa ka jingïakhun final yn pynlong ha madan First Ground, Polo ha ka 17 tarik.
Ïa kane ka jingïakap la pynlong lyngba ka jingkhot kyrpang ïa ki khlur ïalehkai phutbol ka Jylla kiba kynthup ïa u Redeem Tlang, Aiban Dohling bad u Halen Nongtdu lem bad ka Kong Ri-ïohlang Dhar (FIFA Assistant Referee). Ha kane ka jingïalang la pynïaid da u Tournament Director ka MSL u Bah Wanshanbor Kharkrang ha ryngkat ka jingïadon lang ki nongmihkhmat na saw tylli ki kynhun ïalehkai.
Kane ka long ka aïom kaba nyngkong eh ba ka Mawlai ka la ïoh ban ïashim bynta ha ka MSL bad ka la lah ban pynpaw ïa ka jingtbit ha ka rukom ïalehkai da kaba khur jingjop ha baroh san sien ïakhun jong ka Group-A. Ka Rangdajied ka la ïoh ban bat ïa ka kyrdan ba hakhlieh naka Group-B bad kane ka kynhun kaba la wan ha ka kyrdan ba-ar ha ka MSL 2019 kan ïakynduh biang pyrshah ïa ka Lajong (kaba la wan ha ka kyrdan ba nyngkong ha ka Group-C wat la ka dangsah sa kawei ka jingïakhun ha ka sngi Ba-ar). Kine ki kynhun ki la ïakynduh final ha ka MSL 2019 kaba la long ha Khliehriat, ha kaba ka Lajong ka la jop lyngba ka tie-breaker.
Katba ka Khliehmaw-lieh ka la long tang kawei ka kynhun na West Khasi Hills bad kaba ïashim bynta ha ka Super Divi-sion jong ka NDSA, kaba la ïoh rung sha ka semi final bad ka la khmih lynti ban ïalehkai bha na ka bynta ban ïaknieh rung sha ka semi final.
Ha kawei pat ka liang, ka jingïalehkai kaba khatduh jong ka Group-D bad ka Group-C ki la long ha ka lah sngi U Blei, ha kaba ka Chipakkore ka la jop hduh 9-2 kol pyrshah ïa ka Wa’sa FC bd ka Mawten ka la pynliem noh ïa ka Lumdiengngan da 3-0 kol.
Ha ka jingïalehkai kaba la long ha madan Chandmari kaba ha Tura, u Balkan Marak (18′, 47′, 63′, 65′) u la ïoh ban thep haduh saw kol na ka bynta ka Chipakkore, katba ïa ki ar kol la thep da u Harlee K Marak (13′, 84′) bad u Ranggira R. Marak (80′, 90′) bad ïa kawei pat la thep da u Johnfield A. Sangma (47′). Katba na ka Wa’sa la pynphai lyngba u Gilseng Momin (8′) bad u Threesbirth Momin (62′).
Lyngba kane ka nam jop, ka Chipakkore ka la jam sha ka kyrdan balai, hynrei ka Wa’sa ka la hiar noh sha ka kyrdan basaw.
Haba phai ka jingïa-khun kaba la long ha madan MDSA kaba ha Mawkyrwat, ka Mawten ka la ïoh ban thep kol lyngba u Reinjoywell Wasrde (31′), Lastbornson Mar-weiñ (60′) bad u Ïaidborlang Thongni (90’+1). Da kane ka jingjop, ka Mawten ka la jam sha ka kyrdan balai, kata hashwa ïa ka Riangdo, ka ban ïalehkai khatduh ha ka sngi Ba-ar pyrshah ïa ka Shillong Lajong.
