Kakamighara, Jylliew:
Ka jingiaid lynti jong ka kynhun ialehkai Hockey ki kynthei ka ri (Ind) ha ka lympung ialehkai jong ka Women’s Junior Asia Cup ka la nang iai long kaba seisoh naba katei ka kynhun ka la lah ban beh nadien na ka bynta ban ioh pyniakhaid kol da 2-2 ha ka jingiakhun pyrshah bad ka Korea ha ka jingialehkai kaba lai jong ka ha ka lympung.
Shuh shuh ruh, ha kaba iadei bad ka jinglah jong kitei ki ar kynhun ban ia kamai kol ha ka jingiakhun ka long ba ka Korea ka lah sdang ia katei ka bynta da kaba kamai shuwa ia ka shi kol ha ka 15min ialehkai ba lah pynioh da ka Yujin Lee bud pat sa ka kol na ka Jiyon Choi ha ka minit ialehkai ba 30. Katba ka kynhun ialehkai ka ri kaba lah ioh ban kamai kol ha ki por ialehkai ba shadien, ka lah ioh shuwa ban khyllie ia ka shi kol shah thep ha ka 43min lyngba ka Deepika Soreng bad ruh da ka kol na ka Deepika ha ka 54min ialehkai, ha kaba kitei ki thei ialehkai ki lah pynthikna ruh sha ka kynhun na ka bynta ka jingpyniakhaid kol bad ruh ba ka kynhun ka dang iaisah mynta ha ka kyrdan ba nyngkong ha ka Pool A.
Haba phai khyndiat sha ka jingialehkai, ka Korea ka lah pynjlih ia ka rukom ialehkai ka jong ka da kaba iai pynsah ha kaba iadei bad ka jingsam bol para nongialehkai bad pyniaid ia ka jingialehkai baroh kawei pyrshah ia ka India ha ka quarter ba nyngkong, da kaba ioh ruh ban pyniaid halade ha kiba bun ki bynta ki liang jong ka jingialehkai bad ka jingtynjuh katei ka kynhun pyrshah ia ka kynhhun Defence ka India. Wat la ka Korea ka lah ioh katto katne ki PCs (penalty corners) na ka bynta ban pynkylla ia ki sha ki kol, hynrei katei ka kynhun kam shym la lah ban pynurlong sha katei ka bynta.
Hynrei ka long pat ka kynhun kaba la lah ban tam jingjop shakhmat ha kaba nyngkong ha ka por ba ka Lee ka lah ioh ban kamai ia ka shi kol na ka field goal lyngba ka jinglah ban pynbuh bol bha da kawei pat ka nongialehkai na ka bynta ban pynrung ia ka bol hapoh ka jar.
Kumta katba ka Korea ka lah tam kol shakhmat ha kaba nyngkong da 1-0, katei ka kynhun ka lah rung sha ka quarter ba-ar da ka jingialehkai bha shuh shuh ka jong ka bad kaba lah ioh biang ban pyniaid halade ia ka jingiakhun.
Hynrei khyndiat minit ha shuwa ka por ba kin iashongthait, ka India ka lah sdang ban pynkhlain ka rukom ialehkai jong ka pyrshah ia ka Korea, hynrei ka bym shym la shem pat ka lad ka lynti na ka bynta ban ioh pyniakhaid, hynrei ka Korea ka lah pynkylla ka rukom ialehkai jong ka bad sdang ban ialehkai kham khluid shuh shuh kaba lah iarap ia ka kynhun ban khur sa kawei pat ka kol; ha kaba ka Choi ka la lah ban pynkylla sha ka kol na ka PC na ka bynta ban pynlong ia ka kynhun ban tam biang sa 2-0 kol ia ka India.
Ka quarter iakhun kaba lai ka lah sdang ha kaba ka Korea ka lah kyntur shakhmat ha ka jingiaknieh bol bad kaba kloi ruh ban khur ia kawei ka PC bad ha kaba ka nongapkol ka India ka Aditi Maheshwari ka la lah ban tem ia ka bol ba lah tied da katei ka kynhun na ka bynta ban iada ia ka kynhun na ka jingshah pynbam kol.
Kumta ka kynhun India ka lah kyntiew ia ka rukom ialehkai jong ka bad sdang ruh ban pynkulmar ia ka kynhun ialehkai ba shadien jong ka Korea kaba lah pynmih ia u soh ba thiang ia ka kynhun ha ka por ba ka Soreng ka lah ioh ban tied ia ka bol bad pynrung beit ia ka hapoh ka jar na ka bynta ban ai sha ka kynhun ia ka jingpynphai da shi kol.
Katba ka por ialehkai ka dangsah, ka India ka lah ioh mynsiem na ka shi kol ba ka lah kamai, da kaba ialehkai bha shuh shuh tad haduh ba kan da lah syndon ban pynkhaid lyngba ka PC ia kaba la lah ban pynkylla sha ka kol da ka Deepika ha ki minit ialehkai ba kham shadien na ka bynta ban pyniakhaid kol haduh kaba kut jong ka jingialehkai.
Hadien katei ka jingjop, ka India kan hap ban pynkhreh ruh sa na ka bynta kawei pat ka jingialehkai ha kaba kan hap ban iakhun pyrshah ia ka Chinese Taipei ha ka jingialehkai ba saw bad ba khatduh na ka Pool A.
