Shillong, Jylliew 06:
Ka tnat ba dei peit ïa ka rep ka riang bad ki nongrep ka sorkar jylla, ha ka Sngi Ba-Ar ka la pyntip ba la pynduna da 25% ïa ka dor jong ki dawai sboh ba kynthup ïa ka Single Super Phosphate (SSP), Muriate of Potash (MOP) bad Di-ammonium Phosphate (DAP) kum shi bynta ban ai jingkyrshan ïa ki nongrep.
Ha u kyrwoh khubor, ka Secretary ka tnat Agriculture & Farmers’ Welfare ka la ong ba ka sorkar jylla ka la pynkut noh ïa ka jingai duna dor lane ‘Subsidy’ halor ki dawai sboh naduh u snem 2014 ban pynduna ïa ka jingshah ktah jur ki briew bad ka mei mariang na kine ki dawai sboh.
Hynrei, la ong ba ki don ki nongrep ha ki katto katne ki bynta jong ka jylla kiba la bteng ban pyndonkam dawai sboh ban thung soh saw, kubi, phan, bad phul kubi. La ong ruh ba ka jingpynsangeh bad jingpynkut noh ïa ka jingai duna dor ïa ka dawai sboh sha ki nongrep ka la wanrah pat ïa ka jingdie tuh ïa ka dawai sboh kaba la pynlong ïa ki nongrep ba kin hap siew ha ka dor kaba heh.
Namarkata, la ong ba da ka jingthmu ban pynkiew ïa ka jingpynmih ïa ki mar rep bad ban pynkhlaiñ ïa ki lad kamai lyngba ka rep ka riang, ka sorkar jylla ha u Kyllalyngkot 2023 ka la rai ban ai duna dor da 50% ïa ka dawai sboh.
Da kaba buh hakhmat ïa ki artylli ki thong jong ka sorkar jylla, kata, ban ai jingkyrshan ïa ki nongrep ki baduk ha ka jylla khnang ba kin ym duh than ïa ka pisa haba thied ïa ki tiar bad ki mar ba pyndonkam ha ka rep ka riang, bad ban pynthikna ba ka jingrep jingriang kan ïaid noh sha ka rukom ka bym ai dawai sboh (Organic Farming), la rai ban ai ‘subsidy’ lane ban die duna dor ïa ka dawai sboh Single Super Phosphate (SSP), Muriate of Potash (MOP) bad Di-ammonium Phosphate (DAP) da 25%.
