New Delhi, Jylliew:
Kum shi bynta ban nang iai pynshlur bad ai mynsiem shuh shuh ia ki nongialehkai ka ri (India) ha ki lympung ialehkai bapher bapher kiba long ha iing bad shabar ruh kumjuh, na ka liang jong ka ri ka pynbna khubor ba ka lah pynkhreh mynta haduh 255 ngut ki dkhot ialehkai ba khlain bad ba pawkhmat ka ri na ka bynta ba kin mihkhmat sha ka Special Olympics World Summer Games ka ban sa long ha Berlin, Germany naduh ka 17-25 tarik u Jylliew 2023.
Shuh shuh ha kaba iadei bad katei ka bynta, kita ki nongmihkhmat ka ri ki ban sa mihkhmat sha katei ka lympung ki kynthup ia ki 198 ngut ki nongialehkai ki ban shimbynta ha ki 16 jait ki jing-ialehkai bad kiwei pat ki paralok nongialehkai bad ki 57 ngut ki nongpyniaid jong ki kynhun ialehkai bapher bapher. Ka khubor ka iathuh ruh ba katei ka lympung ialehkai ka long kawei na ki lympung ialehkai kaba heh ha ka pyrthei ha ka jingkynthup ia ki kam ialehkai jong ki rynsan bapher bapher ha ryngkatlang ruh ba ki nongialehkai ba duna dkhot-met kiba shemphang bad kiba tbit ha ka kam ialehkai ka jong ki. Kumba 700 ngut ki nongialehkai bad kita ki paralok ialehkai na ki 190 tylli ki ri kin iareng ha ki 26 tylli ki jait jingialehkai ha katei ka lympung. Ha shuwa ba ka kynhun ialehkai ba bun tam jong ka ri kan leit sha Berlin naduh ka 12 tarik mynta u bnai, ki nongialehkai ka ri kin shimbynta ha ka prokram jingpynkhreh ka ban sa long ha Jawaharlal Nehru Stadium naduh ka 7-11 tarik mynta u bnai. Kumjuh ruh ka Special Olympics Bharat kan pynlong ia ka prokram ba kyrpang ia kaba la tip kum ka ‘send-off ceremony’ na ka bynta kitei ki nongialehkai hatei ka madan ialehkai ia kaba yn sa shimbynta da u Myntri ka tnad ialehkai ka ri u Anurag Thakur, ka Smriti Irani kaba long ka myntri jong ka Women & Child Development and Minority Affairs, ka khliehduh jong ka Indian Olympic Association ka PT Usha, u nongialehkai Kriket ba pawkhmat ka ri u Yuvraj Singh bad u kaitor ba pawnam ka ri u Sonu Nigam.
Na ka liang jong ka ri baroh kawei ka khmih lynti ruh ba kitei ki nongialehkai ki ban sa leit shimbynta ha ka lympung kin lah ha ka ban wanrah sha ka ri ia ki takma na ki jait jingialehkai bapher bapher.
Kumta ruh na ka liang jong ka kynhun Myntri ka tnad ialehkai ka ri ka pynbna ruh ia ki khusnam ba kan sa ai sha baroh kito ki nongialehkai ki ban sa wanrah takma sha ka ri na katei ka lympung kata; da ka khusnam song pisa kaba T. 5 lak, T.3 lak bad T. 2 lak na ka bynta kiba lah banrah ia ka takma Ksiar, Rupa bad Rnong.
