Beijing, Jylliew:
Kawei ka khynnah 13 snem na China, ka la pynlut lut ia baroh ka pisa ba ki kmie- ki kpa jongka ki la kynshew tang hapoh jong ki 4 bnai tang ha kaba lehkai game. Katei ka khynnah ia kaba la buhrieh kyrteng, ka dei ka khynnah skul na ka thaiñ Henan bad ka la pyndonkam ia katei ka pisa kumba 449,500 Yuan (Rs. 52,19,809) hadien ba ka la ioh ia ka card sei pisa jong ka kmie kaba don ha iing bad ka ju pynlut ha ki jinglehkai mobile.
Hadien ba kawei na ki nonghikai skul jongka, ka lap ia katei ka jingpynlut phut jongka ha kaba lehkai hapoh skul, ka la sngewthuh ba katei ka khynnah ka lehkai ia ki game ‘online’ bad kumta ka la pyntip sha ka kmie jong katei ka khynnah halor ka jingsuba ba katei ka khynnah ka lah ban pyndonkam da ka pisa ba na iing namar ka la kyrni sha ba palat ia katei ka jinglehkai mobile.
Hadien ba ka kmie ka la peit thuh bad peit ia ka pisa jongka kaba don hapoh Bank, ka shem ba ka pisa jongka baroh ka la lut- khoit bad ka sah sa tang 5 tyngka hapoh ka Account (0.5 Yuan).
Ha kawei ka video ba la saphriang paidbah, la iohi ba katei ka kmie ka la iam pait dohnud ha ryngkat ki kot ki sla kiba pynshisha ia ka jingpynlut jong katei ka khynnah ia katei ka pisa baroh ha ka jinglehkai mobile.
Hadien ba u kpa jong katei ka khynnah u shem ia kane, u la phah ia ka ban iathuh hok bad phla ia ka jingpynlut jongka baroh, katei ka khynnah ka la phla ba ka la pynlut 120,000 Yuan (Rs. 13,93,828) naka bynta ban thied ia katei ka game bad 210,000 Yuan (Rs. 24,39,340) naka bynta ban ioh lehkai ia katei ka game ba ka la thied. Katba 100,000 Yuan (Rs. 11,61,590) ka la pynlut ha ka ban pynthied ia katei ka game na ka bynta 10 ngut kiwei pat ki paralok skul jongka.
Katei ka khynnah ka la ong ba namar ka isynei ia kitei ki paralok jongka, kumta kam banse ban pynthied lem ia ki haba ki kyrpad ia ka. Ka la iathuh ba kam da tip bha shaphang ki laiñ pisa hynrei namar ba ka ioh ia katei ka card sei pisa, kumta ka shu pyniasoh beit ia katei ka card bad ka smart phone jong ka.
