Kyiv, Jylliew:
Ki tnat iarap jong ka Ukraine hapoh ka nongbah Dnipro, ki la ioh sei noh ia ka met jong ka khyllung 2 snem na ka iing ba la twa na ka jingther ‘namding jong ka Russia ha ka Sngi U Blei.
Ha kawei pat ka liang, la ong ba ki bor pyniaid ka Russia ki la bthah ia baroh ki paidbah kiba sah ha ki bynta khappud jong ka Ukraine bad Russia ba kin mih noh shipor ban leit buhai shnong sha kiwei pat ki shnong bad ki thaiñ ba marjan namar ka jingiasiat bad ka thma ka la jur ha kitei ki bynta khappud.
La ong ba ka Russia ha ka Sngi Saitjaiñ, ka la ther ‘namding sha ka thaiñ ba shong ki riew paidbah hapoh jong ka nongbah Dnipro.
Kumta, la ong ba ki briew jong ka kynhun iarap ki la ioh sei noh ia ka met jong katei ka khynnah ha ka por mynmiet ynda ki la wad bad khyllie ia ki bynta ba la twa jong katei ka iing mala, khnang ban ioh sei bad pyllait im lada dang don kino kino kiba dang im hapoh jong katei ka iing ba la twa.
Ki heh ka Ukraine ki iathuh ba katei ka jingther jong ka Russia ha katei ka sngi, ka la shim noh ia ka jingim jong katei ka khyllung kaba dang ar snem ka rta bad kaba dang shu wan sha kane ka pyrthei dang ha u snem 2021 bad kumba 22 ngut kiwei pat ruh kiba la mynsaw bad ngat ha katei ka jingbthei ha katei ka sngi.
