Los Angeles, Jylliew:
Kawei na ki nong-ialehkai ba pawkhmat ka ri India ka Parul Chaudhary ka lah nang iai kyntiew shuh shuh ia ka jingiaid lynti kaba seisoh ha ka kam ialehkai jong ka aiom ialehkai kaba mynta da kaba ioh khur sa ia ka takma Rnong na ka jingiakob Steeplechase 300m ki kynthei ha ka lympung ialehkai kaba long ha Drake Stadium ka USATF Los Angeles Grand Prix 2023 Athletics Meet.
Kham ha shuwa ha une u bnai ba mynta, ka Parul ka la lah ruh ban pynpra ia ka rekod 5000m jong ka ri ha ka jingia aireng jong ka ha Los Angeles bad ia kaba lah bud pat da ka jingkhur jingjop ha ka 3000m Steeplechase ha ka Track Night NYC 2023 Athletics meet ha New York. Kumta ruh ha ka USATF LA Grand Prix 2023, kaba dei ka World Athletics Continental Tour Gold Label Meet, ka Parul Chaudhary ha ka jingiakhun ka jong ka, ka la lah ban pyndep ia ka por ialehkai da 9:29.51 na ka bynta ban khur ia ka kyrdan balai naba ka jingjanai ialehkai ba ha shuwa ka jong ka ha kaba iadei bad ka rekod ka long da 9:38.09. Ha ka tei ka lympung iakhun Steeplechase jong ki kynthei, ka Madie Boreman na USA ka lah khur noh shalade ia ka takma Ksiar da kaba pyndep ha ka por 9:22.99 katba ka nongialehkai Tokyo Olympic ka Alicja Konieczek na Poland ka lah khur ia ka kyrdan ba-ar ha ryngkat bad ka takma Rupa da 9:25.51.
Shuh shuh ruh napdeng ki nongialehkai ka ri ha ka Track & Field ha katei ka lympung ialehkai ba mynta, ka Lili Das ka la lah ban pyndep ia ka jingiakhun jong ka ha ka kyrdan ba saw ha ka jingiakob mareh ki kynthei ha ka 800m jong ka jingiakhun phainal kaba lai da kaba pyndep ha ka por 2:05.27. ha kawei pat ka liang, ka jingiakhun jong ki shynrang ka ri ha ka lympung ha ka Final 2 jog ka 1500m, u rangialehkai ka ri u Jinson Johnson u lah pyndep ha ka jaka ba 11 ha ka por 3:42.97 bad u Rahul da 3:43.83 na ka bynta ban khur shalade ia ka jaka ba 12.
