Shillong, Jylliew 06:
Ka kynhun ïalehkai na Saudi Arabia ka Al Ittihad ka la soi ïa u rangïalehkai na Real Madrid bad France u Karim Benzema na ka bynta lai tylli ki aïom ïalehkai, la pynpaw ki khubor na Al Alarabiya.
Ha ka jingshisha utei u rangïalehkai ba la 35 snem ka rta u la khmih lynti ban ïai sah sa shi snem bad katei ka klob kaba na Spain, hynrei namar ka jingmynsaw ba u la ngat ha ka aïom ïalehkai 2022-23 bad duh ruh ban ïashim bynta ïa ka France ha ka World Cup kaba la long ha Qatar na ka daw kawei pat ka jingmynsaw.
Hynrei katei ka jingshah tyrwa ka jong u lah ban kot palat ïa ka 100 million euros ($107.05 million) ha katei ka klob kaba na Saudi Arabia bad u lah ban kiew biang ka jingïoh ha ka lawei ka ban wan.
Ha ka sngi Ba-ar, u Benzema ha ka jingïalang ai khublei ha Real Madrid um lah khlem da ai khublei ïa kane ka klob bad kumjuh ïa ki paidbah nongkyrshan.
Kane ka jingïalang ka la neh kumba 20 minit ha kaba la ïadon lang tang ki rangïalehkai, bahaïing hasem bad ki paralok ba ïajan.
“Ngam lah ban klet ïa ka Real Madrid namar ka long ka klob kaba biang nadong shadong. Hynrei nga sngew ba mynta ka sngi ka dei ka por kaba nga hap ban mih noh bad ban jam sha uwei pat u mawjam ha ka jingïaid lynti jong ka kam ïalehkai,” la ong u Benzema.
“Ka long kaba eh ban pynpaw ïa shibun kiei kiei, hynrei nga ai khublei ïa ka Real Madrid bad ïa ki para nongïalehkai lang. Ka long ka lynti ha ka jingim ka jong nga. Nga sngew donbok ba nga la lah ban pynurlong ïa ki jingangnud ki jong nga kiba naduh ba nga dangkhynnah.”
Hadien ba u la ïasoh sha ka Real Madrid ha u snem 2009 na ka Olympique Lyonnais, u Benzema u la long u rangïalehkai shakhmat uba kynsai bad snar thep kol hadien ba u Cristiano Ronaldo u la mih ban leit ïasoh sha ka Juventus ha u 2018.
U Benzema u la ïoh ban thep haduh 354 kol na ka bynta ka Real Madrid bad u la long u rangthep kol ba kynsai hadien u Ronaldo.
Une u rangïalehkai u la lah ban pynpaw ïa ka jingtbit ha ka aïom ïalehkai 2021-22 naba u la ïoh ban thep 44 kol ha baroh ki lympung ïalehkai na ka bynta ban pynlong ïa ka Real Madrid ban khur ïa ka nam jop kaba 14 sien ha Europe bad ruh ha ka lympung LaLiga.
U la ïohpdiang ruh ïa ka khusnam Ballon d’Or, na ka bynta u rangïalehkai ba nyngkong eh na France ban khur ïa katei ka trophy naduh ba u Zinedine Zidane u la ïoh ha u 1998 bad uba san haba kheiñ lang baroh.
