Shillong, Jylliew 06:
Ka Shillong Lajong kaba dei ka lahduh jong ki saw snem ba la lah, ka la khur biang ïa ka jingjop kaba saw ha ka Meghalaya State League 2023. Kane ka wan hadien ba ka lah ban pynliem noh ïa ka Riangdo da 2-0 kol ha ka Sngi Ba-ar ha madan MDSA kaba ha Mawkyrwat.
Ha kane ka jingïalehkai u Shano Tariang (55′) lem bad u rangïalehkai ba wan mihpli u Sangti Janai Shianglong (69′) ki la ïoh ban thep kol ha ka kylla miet na ka bynta ban pynlong ïa ka Lajong ban ïai bat ïa ka kyrdan ba hakhlieh ha kaba ka la tam haduh 4 point ïa ka Seven United, kaba la don ha ka kyrdan ba-ar.
Haduh kaba kut ki 66 tylli ki jingïalehkai na baroh ki saw tylli ki group, ka la kynjoh shaduh 297 kol naduh ba ka la sdang ha ka 12 tarik u Jymmang.
Ka jingphai khmat mynta ka long sha ka semi final, ha kaba ka Lajong kan ïasoh lang bad ki lai tylli kiwei pat ki klob kiba kynthup ïa ka Mawlai na ka Group-A, Rangdajied United na ka Group-B bad ka Khliehmawlieh na ka Group-D.
Ïa ka jingpynïakap na ka bynta kitei ki kynhun la pynlong ha ka lah sngi U Blei ha ka nongbah Shillong ha kaba la ïadon lang ki saw ngut ki nongshah khot sngewbha kiba kynthup ïa ki khlur ïalehkai phutbol ka Jylla u Redeem Tlang, Aiban Dohling bad u Halen Nongtdu lem bad u Assistant Referee jong ka FIFA ka Kong Ri-ïohlang Dhar.
Ïa kine ki jingïakhun semi final yn pynlong ha la ïing bad shabar (home-and-away), ka ban sdang ha ka 10 tarik bad ia ka wat kaba ar yn pynlong ha ka 13 tarik mynta u bnai. Katba ïa ka jingïakhun final yn pynlong ha SSA Stadium at First Ground, Polo ha ka 17 tarik.
Ka Khliehmawlieh kan ïakhun pyrshah ïa ka lahduh jong ka Shillong Premier League ka Mawlai SC, katba ka Rangdajied kan ïakhun pyrshah ïa ka Shillong Lajong.
Ka Khliehmawlieh ka dei ka kynhun kaba la shim bynta ha ka MSL 2019, hynrei ka khlem ïoh rung sha ka semi final, katba kan long ka sien kaba nyngkong ïa ka Mawlai ban ïoh rung sha ka semi final ha ka MSL mynta u snem.
Ka Lajong bad ka Rangdajied ki dei kiba la ïakynduh final ha ka MSL 2019 kaba la long ha Khliehriat ha kaba SLFC ka la khur jingjop lyngba ka tie-breaker da 3-0 kol.
