England, Jylliew:
Na ka liang u Moeen Ali uba dei rangialehkai Kriket ka England bad uba tbit ban ialehkai ha baroh ki liang (allrounder) bad kumjuh uba lah pynbna ruh ia ka jingshongthait na ka jing-ialehkai Test ha u Nailur 2021, u pynpaw mynta ia ka mon ba u jied na ka bynta ban leitphai biang sha ka shnat treikam bahakhliehduh jong katei ka kynhun na ka bynta ka jingkyrpad ka jong u ban shah biang sa shisien ban iadonlang bad ka kynhun ha ki jingialehkai ‘Ashes’ ka ban sdang naduh ka 16 tarik mynta u bnai.
Kumta ruh katei ka kynhun ialehkai ka mad ruh ia ka jingeh kaba khraw hadien ba u Jack Leach u lah kynran-dien noh ban ia aireng ha katei ka lympung na ka daw ka jingshitom kaba u lah ioh ha ka por ba ka England ka rah ia ka jingjop ha ka Test pyrshah ia ka Ireland.
Shuh shuh ruh ka khubor ka iathuh ba na ka liang jong ka tnad treikam ka England ka lah mynjur ia ka jingkyrpad jong u Ali na ka bynta ba un pyniasoh biang bad ka kynhun ialehkai Ashes na ka bynta ki jingiakhun ki ban wan kum u nongmih bujli ha ka jaka jong u Jack Leach. Katei ka tnad treikam ka dang wad ruh sa kiwei ki lad ki lynti kum ia u Liam Dawson, Rehan Ahmed bad Will Jacks.
Kum ban shu pynkynmaw biang mynta ka long ba u Moeen Ali u lah shongthait noh na ka jingialehkai Test naduh u Nailur 2021 ha ka por ba ka kynhun ka ia aireng pyrshah ia ka India ha katei ka lympung ialehkai. Kumta ruh u Ali u lah dep ban ialehkai 64 tylli ki jingialehkai bad ka jinglah jong u ban kamai ia ki 2,914 ron ha ryngkat bad ka Average kaba la kot sha ka 28.29 bad ka jinglah ruh jong u ban khur wiket haduh 195 ngut ha ka kam ialehkai Test ka jong u.
Ka kynhun ialehkai ‘Ashes’ jong ka England ka ban iakhun pyrshah ia ka Australia mynta u snem ka kynthup:
Ben Stokes (C), Ollie Pope, Jonny Bairstow (wk), Joe Root, James Anderson, Stuart Broad, Harry Brook, Ben Duckett, Zak Crawley, Matthew Potts, Ollie Robinson, Dan Lawrence, Chris Woakes, Mark Wood, Josh Tongue.
