Singapore, Jylliew:
Ka jingiaid lynti jong u khlur ialehkai Badminton ka ri u Kidambi Srikanth ha ka lympung ialehkai jong ka Singapore Open Super 500 tournament ka lah long kaba seisoh hadien ba u la lah ban khur shalade ia ka jingjop ba nyng-kong.
Hynrei ka PV Sindhu bad u HS Prannoy ki lah mad noh ia ka jingshah pynkut jong ka jingiaid lynti ha katei ka lympung hadien ba mad ia ka jingshah pynrem tang ha ka kylla iakhun ba nyngkong.
Kumta ha kaba iadei bad ka jingkhur jingjop ba nyngkong da u Srikanth uba long ruh u nongkhur takma Rupa na ka 2021 World Championships, ka long ha ka jinglah jong u ban pynliem noh ia u nongiakhun pyrshah na Thailand u Kantaphon Wangcharoen da 21-15 21-19 jong ka rynsan iakhun para marwei. Kumta hadien katei ka jingjop, u Kidambi un pynkhreh pat sa na ka bynta ban iakhun bad u nongialehkai na Chinese Taipei u Chia Hao Lee; uba la lah ban pynrem noh ia u nongiakhun pyrshah jong u na Japan u Kenta Nishimoto.
Haba phai pat sa sha kawei ka jingialehkai, u nongkhur jingjop ha ka Orleans Masters u Priyanshu Rajawat u la lah ban khur mynta shalade ia ki 21-12 21-15 jingjop pyrshah ia u nongialehkai na Japan u Kanta Tsuneyama na ka bynta ban jam pat sha ka kylla iakhun kaba ar bad hadien katei ka jingjop, u Priyanshu un iakhun pyrshah sa bad u nongialehkai na Japan uba bat ia ka kyrdan ba saw ha ka pyrthei u Kodai Naraoka.
Ha kaba iadei bad ka jingshah rem noh ka Sindhu ha kaba sdang jong ka jingiakhun ka jong ka, ka khubor ka iathuh ba ka tei ka nongialehkai watla ka lah iakhun bha naduh kaba sdang, pynban kam shym la lah ban leh eiei na ka jingtbit ialehkai jong ka Akane Yamaguchi na Japan kaba lah khur noh shalade ia ki 21-18 19-21 17-21 jingjop. Shuh shuh ruh u Prannoy uba lah rung sha ka tei ka lympung hadien ba u lah khur ia ka nam kum u lahduh ha ka Malaysia Masters bad rah ia ka trophy BWF ha ka sien kaba lai, ha katei ka jingiakhun jong u ha ka lympung um shym la lah ban leh kano kano ka kam na ka bynta ban pyllait ialade na ki kti ialehkai ba tbit jong u nongiakhun pyrshah na Japan u Naraoka uba lah khur shalade ia ki 15-21 19-21 jingjop.
Shuh shuh ruh na ka kyrdan iakhun ba mar arngut, u MR Arjun & Dhruv Kapila, watla ki lah ialehkai bha ha kaba sdang bad kiba lah pynseisoh ia ka jingiaid lynti jong ki ha ka lympung da kaba khur noh shalade ia ki 21-16 21-15 jingjop pyrshah ia ki nongialehkai na France u Lucas Corvee & Ronan Labar ha ka kylla iakhun ba nyngkong. Napdeng kiwei pat ki nongialehkai ka ri, ka Saina Nehwal ka lah mad ia ka jngshah pynrem noh da 13-21 15-21 ha ka lahduh barim ha ka pyrthei ka Ratchanok Intanon na Thailand katba ka Aakarshi Kashyap ka lah shah pynrem sa ha kawei pat ka nongialehkai na Thailand ka Supanida Katethong da 21-17 21-9.
