Shillong, Jylliew 06:
Ka Tottenham Hotspur ha ka sngi Ba-ar ka la pynbna ba ka la thung da u coach barim ka Celtic u Ange Postecoglou kum u manager ba thymmai ka klob hadien ba u la soi ïa ka kontrak kaba saw snem kynthih bad kane ka klob jong ka Premier League.
Ka jingthung ïa u Postecoglou ka long ka sien ka nyngkong eh ban wanrah ïa u coach na Australia ban pynïaid ïa kane ka klob ha ka Premier League.
Utei u coach ba la 57 snem ka rta, u la lah ban pynpaw ïa ka jingtbit ha ka por ba u dang don ha Celtic ha ka lympung ïalehkai jong ka Scottish Premiership kaba dang shu kut shen.
“U Ange u long uba khlaiñ ha ka bor pyrkhat bad ban sei ïa ki rangïalehkai kiba tbit ha ka bynta kaba shakhmat,” la ong u chairman ka Spurs u Daniel Levy ha ka kyrwoh.
“U la long uba pat bha ha ka ban kyntiew ïa ki rangïalehkai bad uba sngewthuh kumjuh ban kyntiew ïa ki rangïalehkai kiba mih na ki shlem ai jinghikai. Kumta ngi da sngewkmen eh ban ïoh ïa u Ange na ka bynta ban pynkhreh ïa ka aïom ka ban wan.”
Ka jinglah u Postecoglou ban kyntiew ïa ka Celtic ka la pynlong ïa ka Tottenham ban phaikhmat sha u namar kane ka klob ka dang ïai khmih lynti ban ïoh ïa u coach ba pura hadien ba mih noh u Antonio Conte.
U Conte uba dei u manager na Italy, u la shimti ïa ka Spurs ha u 2021. Pynban um shym la lah ban pynurlong ïa ka jingangnud kane ka klob ha ki 15 snem.
Hadien ka jingmih noh u Conte ha u Lber, u Cristian Stellini bad u Ryan Mason ki la shimti shipor ban pynïaid ïa kane ka klob. Hynrei kane ka klob ka la thrang ban wanrah noh ïa u coach ba pura bad mynta ka la thung ïa u Postecoglou.
Kum ban shu pynkynmaw, ka Tottenham ka la rah ïa ka nam lahduh kaba khatduh eh ka dei ha u snem 2008 ha ka League Cup. Kumta kane ka klob ka la shaniah ha u Postecoglou ban pynurlong biang ïa kane ka klob kaba na North London bad ban pynurlong ban khur ïa ka jingjop.
Ka Spurs kaba la wan ha ka kyrdan ba phra ha ka lympung English Premier League bad ka long ka sien kaba nyngkong eh ban kan duh rung sha ka lympung ïalehkai ha Europe naduh ka aïom ïalehkai 2009-10.
