Shillong, Jylliew 06:
Ka long ka jingduh kaba khraw ïa ki ‘thei ïalehkai phutbol ha ka ri, hadien ba ka Kerala Blasters ka la pynbna ban weng shwa shipor ïa ka kynhun ki ‘thei ïalehkai na ka daw ka jingeh ha ka liang ka jingpynlut pynsep.
Kane ka jingïakynduh jingeh ha ka liang ka jinglut jingsep ka la wan hadien ba kane ka klob ka la shah daiñ kuna ha ka All India Football Federation na ka daw ba ka kynhun ki rangïalehkai ka la mih shabar na ka jingïakhun ‘playoff’ jong ka Indian Super League ha ka aïom na la lah.
Na ka liang ka AIFF ka la daiñ kuna T. 4 klur ïa ka Kerala Blasters hdien ba ka kynhun ki rangïalehkai ki la mih noh na ka jingïalehkai pyrshah ïa ka Bengaluru FC ha ka 3 tarik u Lber. Ki la mih na madan ïalehkai kum ka dak ka jingpyrshah halor ka kol ba la thep da u rangïalehkai ka Bengaluru FC u Sunil Chhetri na ka free-kick.
Ha katei ka jingjia, u rephri u Crystal John um shym la put ïa ka whistle hashwa ba u Chhetri un shut ïa ka bol bad na ka liang ki rangïalehkai ka Kerala Blasters ki la pynpaw ba ïa katei ka kol ym dei ban ailad naamr kim la long kiba la pynkhreh. Te kumta na ka liang ki rangïalehkai ki la rai ban mih noh na madan kum ka dak ka jingpyrshah.
Haba pynpaw halor katei ka jingjia, u Chhetri u la ong ba u la dep pyntip sha u rephri ba um shym kwah ban shut ynda la ker tawiar da ki rangïalehkai, hynrei u la ong ba u don ïa ka hok ban shut kynsan ha ka free-kick kaba ïaid kat kum ki kyndon.
Hynrei katei ka jingshah daiñ kuna na ka kynhun ki rangïalehkai, ka la ktah pat ïa ka kynhun jong ki kynthei da kaba ka la shim rai ban weng shwa shipor.
“Da ka mynsiem kaba khia ngi pynbna ban pynsangeh shwa shipor ïa ka kynhun ki ‘thei ïalehkai. Kane ka rai ka long namar ka jingktah halor ka jingshah daiñ kuna ka klob ka jong ngi ha ka AIFF,” la pynpaw kat kum ka kyrwoh na ka Kerala Blasters.
Lah ban pynkynmaw ba na ka liang ka AIFF ka la kyntait ïa katei ka jingkyrpad pyrshah ïa katei ka jingshah daiñ kuna. Ka synjuk ka la kyntait ruh ia u coach ka Blasters u Ivan Vukomanovic halor ka jingshah daiñ kuna kaba T. 5 lak bad ruh ka jingshah sospon kaba 10 tylli ki jingïalehkai pyrshah ïa u.
