Shillong, Jylliew 07:
Ki khlur nongïalympat ka ri kiba kynthup ïa u Bajrang Punia bad ka Sakshi Malik kiba long ki nongïalam ba hakhmat eh ban ïakhih pyrshah ïa u President ka Wrestling Federation bad uba dei ruh u MP na ka seng BJP u Brij Bhushan Sharan Singh, ki la pynlong ka jingïalang bad u Myntri ka tnat ïalehkai ka Sorkar Pdeng u Anurag Thakur ha ka ïingsah ka jong u hadien ba u la khot sngewbha ïa ki lyngba ka sla Twitter.
Kane ka long ka jingïalang kaba ar hapdeng kitei ki nongïalehkai bad ka sorkar ha ki san sngi. Ki nongïalympat ki la ïakynduh ïa u Myntri ka tnat pohïing u Amit Shah myn ha ka sngi Saitjaiñ halor ka jingdawa ban pynshitom pyrshah ïa u Brij Bhushan Sharan Singh, uba la shah kynnoh ba u la jrong-kti ïa ki hynñiew ngut ki ’thei ïalehkai.
“Ka sorkar ka la kwah ban pynlong ka jingïamir jingmut bad ki nongïalehkai halor katei ka mat jingdawa jong ki. Sa shisien nga la khot sngewbha ïa ki nongïalympat na ka bynta katei kajuh ka mat,” la pynpaw u Thakur ha ka twitter hynnin ka miet.
Katei ka jingpynpaw ka long hadien katto katne kynta ba u Bajrang Punia u la pynpaw ha kawei na ki lad pathai khubor, ha kaba u la kyntait ban mynjur ïa kano kano ka jingïakut bad ka sorkar bad u la ong ba ki nongïalehkai ki la shah maham ba kim dei ban pynpaw eiei halor ka jingïalang bad u Amit Shah. Ki khubor ki ïathuh ba u Punia ka la ïohpdiang ïa ka phone kaba la wan na u Myntri ka tnat pohïing, uba la khot sngewbha ïa ki nongïalympat na ka bynta kawei pat ka wat jingïakren biang sa shisien pat.
Na ka liang u Punia ka la pynpaw ha u Shah ba ki nongïalympat kim kwah ba katei ka jingïalang kan shu long kaba jar jar.
Hadien ba u Amit Shah u la ïoh ban ïakren bad u Punia, u Thakur u la pynpaw ha ka sla twitter na ka bynta ban wan sha ka jingïakren.
Hadien katei ka jingïalang, u Punia u la ong ba u Shah u la pyntip ba ka jingtohkit ka dangïaid shakhmat.
“Kane ka jingïakhih kam shym la shongthait ha kaba kan ïai bteng. Ngi la don ha ka thong kumno ban jam shakhmat halor ka jingïakhih pyrshah. Ki nongïalehkai kim da sngewhun halor ka jubab ne ki jingmynjur ka sorkar halor ki jingdawa ki jong ngi,” la bynrap u Punia.
U Shah u la shong jingïalang bad u Punia, Sakshi Malik, Sangita Phogat, abd u Satyawart Kadian haduh palat ïa ka shi kynta ha ka por 11 baje mynmiet.
Kitei ki hynñiew ngut ki ‘thei ialehkai, kynthup ïa kiba dangkhynnah, ki la kynnoh ïa u Brij Bhushan Sharan Singh uba la jrong kti bad leh tohmet ïa ki. Te kumta na ka liang ki nongïalehkai ki la dawa da ka jingtohkti kaba khlem ïasah liang bad ban pynshitom ïa utei u nongïalam ka synjuk.
