![Hadien ba pynliem ïa u Stefanos Tsitsipas, Yn ïakynduh semifinal u Carlos Alcaraz pyrshah ïa u khlur ïalehkai na Serbia Grand-slam](https://unongsainhima.com/wp-content/uploads/2023/06/Grand-slam-jpg.webp)
Paris, Jylliew:
Sa shisien biang pat na ka liang jong u khlur ialehkai Tennis ka ri Spain u Carlos Alcaraz u lah pyni ia kata ka jingsngewtynnad ka jong u ban shimbynta ha ki lympung iakhun bapher bapher kynthup ha ka lympung ialehkai ba mynta ka French Open, ha kaba utei u rangialehkai u la lah ban khur biang shalade ia ka jingjop da 6-2, 6-1, 7-6 (7/5) pyrshah ia ka nongialehkai na Greece u Stefanos Tsitsipas na ka bynta ban jam pat sha ka rynsan iakhun semifinal ha ka lympung.
Kumjuh ruh utei u nongialehkai na Spain u lah dep ban khur jingjop ha baroh ki san sien iakynduh ki jong u bad u Tsitsipas bad uba lah kylla long mynta u nongialehkai khynnah tam ha katei ka lympung iakhun Grand Slam ba mynta ban jam sha ka semifinal naduh ka por jong u Novak Djokovic ha u snem 2007. Ha ka jingialehkai, u Tsitsipas u lah sdang ia ka jingiakhun da ka jingskhem jingmut ka jong u bad ialehkai bha, hynrei u Alcaraz shen u lah ioh pat ban pyniaid ia ka jingialehkai baroh kawei da ki ar jingpynkhein dor-thong ia u Stefanos na ka bynta ban khur shalade ia ka jingjop ha ka set iakhun kaba nyngkong. Shuh shuh ruh ka jinglah ban ialehkai bha da u Alcaraz lyngba ki drop shots bad kiwei pat ki rukom pyllait bol ha ka jingiakhun ka long kaba lah seisoh haduh ba u Tsitsipas un da aiti noh ialade ha ka set iakhun kaba ar da kawei ka double fault. Kumta katba ka jngiakhun ka dang iaid, u Carlos u lah ioh ban pynkhein kloi ia ki dor-thong jong u Stefanos ha ka set balai hynrei u bym la lah pat ban tied ia ka bol Shabar jong u lain ha ka 5-3 bad kaba lah pynlong ia u Tsitsipas ban lah halade ban iada ia ki sand or-thong ha ka jingialehkai ha shuwa ba un shah pynliem noh ha ka jingiakhun tie-break. Kumta ruh hadien katei ka jingjop, u Carlos un hap ban pynkhreh bha ialade na ka bynta ka jingiakhun semifinal kaba kham jwat ha kaba un hap ban iakhun pyrshah bad u Novak Djokovic. Kumba ka long mynta, u Djokovic u dang iai kthong na ka bynta ban khur ia ka khet jingjop kaba lai na katei ka lympung ialehkai bad ka rekod jingjop kaba 23 na ka jingiakhun Grand Slam paramarwei jong ki shynrang, hadien ba u la lah ban khyllie ia ki dor-thong jong u na ka jingpynlait-ei ha ka set iakhun kaba nyngkong na ka bynta ban pynliem noh ia u rangiakhun pyrshah u Karen Khachanov da 4-6, 7-6 (7/0), 6-2, 6-4. U Novak u don mynta ruh ha ka lynti jong ka jingrung sha ka jingiakhun semifinal ha ka sien kaba 12 bad kaba 45 ha kum kitei ki lympung ialehkai kiba paw bad ruh ka jingioh ban iakynduh ia aireng bad u Alcaraz na ka bynta ka jingiaknieh jaka sha ka phainal hadien ba u Carlos u la lah ban pynliem noh ia u rangiakhun pyrshah jong u ha baroh ki set iakhun.