Shillong, Jylliew 07:
U N’Golo Kante u la ïohpdiang ïa ka jingtyrwa ba un ïoh ïa ka jingsiew ka ban kot shaduh €100m (£86.2m) ha ka shi snem lada u leit ïasoh sha ka klob kaba na Saudi Arabia.
Ka kontrak jong une u rangïalehkai shapdeng ka Chelsea kan kut noh mynta u snem. Kumta na ka liang ki nonglam ktien na Saudi Arabia ki la don ha London na ka bynta ban buh ïa katei ka jingtyrwa.
Ïa u Kante la kwah ban soi da ka Al-Ittihad bad Al-Nassr, kaba long kawei na ki klob na Saudi kaba riewspah. Kane ka klob ka la don bynta ruh ban long trai ïa ka Newcastle United da kaba ka ïoh ïa ka bhah kaba 75%. Kumta kane ka klob ka la khmih lynti ban ïoh ïa ka jubab na u Kante na ka bynta ka jingwan pynïasoh.
Kum ban pynkynmaw u Karim Benzema u la soi ïa ka kontrak na ka bynta ban leit ïasoh sha ka Al-Ittihad hadien ba u la mih noh na ka Real Madrid bad ka Al-Nassr ka don ïa u Cristiano Ronaldo uba la pynïasoh ha u Nohprah jong u snem ba la dep. Ka jingïateh soskular jong kitei rangïalehkai kan kut haduh u 2025 ha ka jingsiew kaba long kumba €200m ha ka shi snem bad kawei kiwei.
Kumba ka paw ïa u Lionel Messi la thmu ban soi da kawei pat ka klob kaba na Saudi Arabia bad u la shah tyrwa palat £350m ha ka shi snem da ka Al-Hilal.
Ki klob kiba na Saudi ki la khmih lynti ban soi ïa u Sergio Busquets hadien ba u la mih noh na ka Barcelona bad u Pierre-Emerick Aubameyang, uba la mih noh na ka Chelsea, bad la buh ka jingtyrwa da ka Al-Ahli bad ka Al-Shabab. Ka Al-Hilal bad ka Al-Ahli ki la long kiwei pat ki ar tylli ki klob ha kaba ka Public Investment Fund ha Saudi ka long 75%.
Ha kawei pat ka liang, u Kante u dang ïai khmih lynti na ka bynta ka kontrak kaba thymmai bad ka Chelsea. Kumta u la thrang ban bteng biang haduh u Lber, hynrei haduh mynta yn pat shym la lah ban pynbeit. Une u rangïalehkai yn sa kynjoh sha ka rta kaba 32 snem ha u Lber bad u la duh ïalehkai ha ki khyndai sien iakhun ha kane ka aïom na ka daw ki jingmynsaw.
