Shillong, Jylliew 07:
Ha kawei ka jingjia kaba sngewsih, arngut ki samla ki la duh noh ïa la ka jingim hadien ba ki la ngam jyllop ha ka wah Brahmaputra ha ka Sngi Ba-Ar.
Kitei arngut ki samla ki dei ba la tip kyrteng kum u Heibormi Laloo, 27 snem ka rta, ba shong ba sah ha Mawïong bad u Rahul Chettri, 24 snem ka rta, uba shong ba sah ha Dymmiew.
Katkum ka jingïathuh jong u Bah Donkupar Laloo, uba dei u hynmen trai jong u Heibormi Laloo, u la ong ba u para jong u ha ryngkat bad ki 5 ngut ki paralok ki la leit sha Assam ha ka Lah Sngi U Blei.
U Bah Donkupar u la ïathuh ba ha ka step jong ka Sngi Ba-Ar, kitei shi paralok ha kaba nyngkong eh ki la thmu ban leit jngi shapoh ka ‘Swimming Pool’ hynrei namar ba ka jngai na ka jaka sah, ki khlem poi leit shuh bad ki la ïa leit kai noh sha kawei ka jaka ïa kaba la tip kyrteng kum ka Panikhaiti kaba don hajan ka Wah Brahmaputra da ka jingthmu ban ïa leit jngi shi paralok namar ka jingshit palat ka suiñbneng.
Na ka liang u samla Jonathan Laloo uba dei u para arkmie jong u Heibormi bad uba la la leit lang ha katei ka sngi, u la ïathuh ba katkum ka jingïoh jingtip jong u hadien katei ka jingjia, katei ka wah dang mynshem taïew, ka JCB ka dang shu wan khlong khyndew kaba la pynlong ïa ka khyndew ba kan jem bad kum ki briew kiba wan nabar ka jylla, ki khlem tip eiei halor kata, bad ki la leit ban jngi sha katei ka jaka.
U samla Jonathan u la ïathuh ba u khlem leit jngi namar ba um nang ban jngi hynrei u la shu peit kai ïa ki paralok jong u kiba la leit ban jngi. U la ong ba dei ha ka por ba u Rahul u la jngi ha katei ka wah bad ngam jyllop ba u Heibormi, haba ïohi ïa kane ka jingjia, u la leit ban ïarap ïa la u paralok. Hynrei ka long kaba sniewbok ba kine baroh arngut ki samla ki la ngam jyllop lang ha katei ka jaka watla na ka liang jong kiwei pat ki paralok kiba la ïa leit lang ki la ïaleh ban ïarap ïa kitei ki arngut.
Shuh shuh u samla Jonathan u la ïathuh ba mar ïa ïohi ba u Heibormi bad u paralok jong u ki la ngam jyllop, na ka liang ka jong u bad kiwei pat ki paralok ki la pyrta briew ban ïarap ha ryngkat ka jingwad ïa ki dieng ki siej ban tan ïa kitei ki arngut hynrei kim lah shuh ban ïarap. Kumta ki la mih sha surok ban khot briew bad na ka liang jong ki katto katne ngut ki briew, ki la phone mar mar ïa ki pulit kiba la wan poi ha katei ka jaka.
U samla Jonathan u la ïathuh ruh ba ka jingngam jyllop jong kitei ki arngut ka dei namar ka jingkhlaiñ eh ka bor jong ka um.
Na ka liang ki pulit jong ka Pragjyotishpur Police Station hadien ba ki la ïoh jingtip halor katei ka jingjia, ki la leit sha katei ka jaka bad da ka jingïarap jong ka kynhun State Disaster Response Force (SDRF) ki la ïoh ban sei noh ïa ka met jong u Heibormi ha ka janmiet jong ka Sngi Ba-Ar katba ïa ka met jong u Rahul la lah ban sei mynta ka sngi.
Ïa ka met jong u Heibormi la wanrah noh sha ïing ha Mawïong mynta ka sngi hadien ba la pyndep ïa ka post mortem bad ka jingleit on tep ïa utei u samla kan long lashai ka sngi.
