Yecheon, Jylliew:
Kawei na ki thei iakob mareh na India ka Laxita Vinod Sandila ka la lah mynta ban khur shalade ia ka takma Ksiar na ka jingiakob mareh 1`500m ki kynthei ha ka lympung ialehkai ba mynta ha Yecheon ka Asian U20 Athletics Championship 2023.
Ha kaba iadei bad katei ka jingjop bad ka jinglah da ka tei ka nongalehkai ba khur ia ka takma bahakhmat eh jong ka lympung, ka long hadien ka jinglah jong ka ban kynjoh sha u lain ba khatduh jong ka jingiakob mareh da kaba pyndep ha ka por 4:24.23 sekhon. Kumjuh ruh ka kynhun ialehkai 4x400m Relay ki kynthei ka ri ruh ki lah pynseisoh ia ka kam ialehkai jong ki da kaba khur ia ka tei kajuh ka takma ha ka jinglah ban pyndep ia ka jingiakhun ha ka por 3:40.491sekhon. kumjuh ruh ka kynhun ialehkai jong ki shynrang kam shym la lah ban bat ia ka jingtam jingjop jong ka shakhmat bad kaba la lah pat ban khur ia ka takma Rupa da kaba pyndep ha ka por 3:08.787- sekhon. Ha ka iakob mareh ki shynrang ha ka 1500m,u Mehdi Hasan u lah khur shalade ia ka takma Rnong ha ka por 3:56.01 sekhon.
Shuh shuh ruh u Shivaji Parashu Madappagoudra u lah tam noh shakhmat ia u nongialehkai na Korea u Kim Taehun da tang da ki sekhon na ka bynta ban khur shalade ia ka takma Rupa; ha kaba utei u nongialehkai ka ri u lah pyndep ha ka por 14:49.058 na ka ynta ban pynliem noh ia ka por jong u nongiakhun pyrshah kaba da 14:49.555. Kumjuh ruh u Nagashima Sonata na Japan u lah khur shalade ia ka takma Ksiar na katei ka jngiakob mareh.
Kham hashuwa, u Sunil Kumar u la lah ban kamai ia ki 7003 dor-thong bad khur ruh ia ka takma Ksiar na ka jingialehkai Decathlon ki shynrang. Nalor jong ka jingpawnam ka jong u ha katei ka lympung ialehkai bad na katei ka jait jingialehkai, ka Pooja ruh kumjuh ka la lah ban khur shalade ia ka takma Rupa na ka jingialehkai High jump hadien ba u lah pyndep ia ka jingiakhun da ka jinglah ban kynthih ha ka jingjngai kaba 1.82m katba ka Bushra Khan ka lah khur ia ka takma Rupa na ka 3000m iakob mareh.
Ha ka 4x100m Relay jong ki kynthei, ka kynhun ialehkai ka ri ka lah ban khur shalade ia ka takma Rnong da ka jinglah ka kynhun ialehkai ban pyndep ha ka por 45.36sekhon. Kumba ka paw haduh mynta, ka India ieng mynta ha ka rynsan ha ka kyrdan ba 3 ha ka miej khein takma kata hadien ka Japan bad China da 18 tylli ki takma kaba kynthup ia ki 6 tylli ka takma Ksiar, 6 ka Rupa bad 6 ka Rnong.
