Shillong, Jylliew 07:
Kan long ka sien kaba nyngkong eh ba ka nongbah Shillong kan ïoh ban pynlong ïa ki katto katne ki jingïalehkai na ka bynta ka lympung 132nd Durand Cup.
Ïa kane la pynbna da ka Local Organizing Committee (LOC) jong kane ka lympung ha ka Sngi Balang ha kaba kane ka nongbah ryngkat bad ka Kokrajhar (Assam), kin long ki nongbah kiba thymmai ki ban pynlong ïa kane ka lympung ïalehkai phutbol ka ban neh haduh shi bnai kynthih, ka ban sdang naduh 3 tarik u Nailar haduh 3 tarik u Nailur.
Ha u snem ba la lah (131st edition) u khlur ïalehkai phutbol ka ri u Sunil Chhetri u la ïoh ban rah ïa ka trophy ha ka sien kaba nyngkong eh ha ka kam ïalehkai jong u. Kane ka wan urlong hadien ba ka Bengaluru FC ka la lah ban pynliem noh ïa ka Mumbai City FC da 2-1 kol ha ka jingïakhun final kaba la long ha Vivekananda Yuba Bharati Krirangan (VYBK) kaba ha Kolkata.
Haba pynpaw ha ka jingïalang u Lt. Gen. u R.P. Kalita PVSM, UYSM, AVSM, SM,VSM, General Officer Commanding in Chief (GOC-in-C) ka Eastern Command u la ong, “Ka Durand Cup ka long ka jingsarong ba ka kynhun shipai jong ka Indian Army ka la pynlong ïa kane ka lympung la palat shispah snem. Ngi la pynpaw ïa ka jingangnud ba ngi kwah ban pynïaid ïa ka Durand Cup sa ha ka thain shatei lammihngi bad ngi sngewkmen eh ba mynta u snem ngin pynlong ïa kane ka lympung sa ha ka nongbah Shillong kaba long ka nongbah ba itynnad jong ka jylla Meghalaya. La bynrap ruh ban pynlong ha Kokrajhar kaba long ka nongbah kaba thymmai na ka bynta ban kyntiew ïa kane ka lympung ïalehkai ha jylla Assam, kaba long ka jylla kaba heh ha ka thaiñ shatei lamihngi. Kane kan ym lah ban urlong lada khlem ïatrei lang bad ki sorkar ka jylla Assam bad Meghalaya. Ka sorkar West Bengal kan ïai long ka nongkyrshan ba radbah namar ka la ju ïoh ban pynlong ïa ka Durand Cup naduh ki snem ba la leit.”
Nalor kitei ki nongbah bad ki jaka, ha kane ka lympung yn sakhi ïa ka jingwan ïashim bynta lang ka kynhun na ka nongbah Shillong kaba la ïoh rung biang sha ka I-League, ka Shillong Lajong Football Club bad kiwei pat ki klob.
Ha kane ka lympung ïalehkai yn sakhi ruh ïa ka jingwan tuid ki paidbah nongpeitkai na ki saw tylli ki nongbah kum na Kolkata, Guwahati, Shillong bad Kokrajhar.
