Dubai, Jylliew:
Katkum ka khubor ba lah ioh lum ka iathuh ba u rangkawang bols-sted ba pawbha jong ka kynhun ialehkai Kriket ka England u Stuart Broad u lah ioh mynta ban kyntiew kyrdan ialade hadien ka jinglah jong u ban khur ia ki 6 wiket ha ka jingialehkai bha ha kawei ka jingialehkai Test pyrshah ia ka Ireland, ha kaba u lah ioh biang mynta ban rung sha ka thup ba 10 jong ka thup kyrdan ba thymmai jong ki nongkawang bol ha ka jingialehkai Test katkum ka jingpyllait khubor da ka International Cricket Council.
Shuh shuh ruh da kaba khur ia ki 5/51 bad 1/62 ha baroh shi lynter jong ki ar innings ha katei ka lympung iakhun pyrshah ia ka Ireland, mynta u Broad u lah kiew da ar jaka sha ka kyrdan ba 10 ha ryngkat bad ki 744 rating points ha ka jingpynkhreh mynta ka kynhun na ka bynta ka ‘Ashes’; ha kaba utei u rangialehkai u lah ioh ban pyniasohlang bad ki para ba ialehkailang kata u James Anderson uba lah wan ba 2 da 850 rating points bad u Ollie Robinson ha ka jak aba 7 da 777 rating points ha katei ka thup. Shuh shuh ruh u nogtied ka England u Harry Brook u lah jam mynta da shi jaka na ka bynta ban kynjoh sha ka kyrdan ba 18, u Ollie Pope u lah kiew da shiphew jak ana ka bynta ban shong ha ka jak aba 23 bad u Ben Duckett u lah kamai mynta da phra jaka sha ka kyrdan ba 34, ha ka jngshah kyntiew kyrdan jong ki mynta ka long hadien ba ki lah ialehkai bha ha katei ka jngiakhun pyrshah bad ka Ireland.
Kumjuh ruh u Brook u lah dep ban kamai ia ki 56 bad 12 khlem shah pynliem ha ka por ba ka England ka lah rah ia ka jingjop da 10 wiket bad ha kaba u Pope u lah khur ia ka nam ‘Player of the Match’ na ka bynta ka innings ba nyngkong ka jong u kaba u la lah ban kamai haduh 205. Ha kawei pat ka bynta, u Josh Tongue u la rung sha katei ka thup kyrdan ba thymmai kata sha ka kyrdan ba 82 hadien ba u la lah ban khur ia ki 5 wiket ha ka innings ialehkai kaba ar. Na ka bynta ki rangialehkai ka England ha katei ka thup ba mynta, ka khubor ka iathuh ba u Andy McBrine u lah jam mynta sha ka thup ba 100 hadien ka jngiakhun ka jong u ha ka jingia aireng da kaba kamai haduh 86 ron khlem shah pynliem ha ka innings ialehkai kaba ar; katba u Mark Adair u lah jam mynta da haduh 32 jaka na ka bynta ban ioh rung ha ka jaka ba 105 hadien ka jinglah ban kamai ia ki 88.
