Paris, Jylliew:
Ka khlur ialehkai Tennis na ka ri Belarus kaba bat mynta ia ka kyrdan ba ar ha ka pyrthei ka Aryna Sabalenka, ka lah jam mynta sha ka rynsan iakhun semifinal ha ka lympung ialehkai ba mynta jong ka French Open. Kane ka wan urlong hadien ba katei ka nongialehkai ka la lah ban pynliem noh ia ka nong-iakhun pyrshah na Ukraine ka Elina Svitolina.
Shuh shuh ruh kawei pat ka nongialehkai na Czech Repubic ka Karolina Muchova da ka jngiakhun ba tyngeh ka jong ka, ka la lah ban pynkut noh ia ka rukom ialehkai jong ka nongiakhun pyrshah ka Anastasia Pavlyuchenkova da kaba khur shalade ia ki dor-thong jingjop na ka bynta ban jam sha katei ka rynsan iakhun ha ka sien kaba nyngkongeh ha ka jngim ka jong ka. Kumta da ka jingioh jong ka ban rung sha katei kawei pat ka rynsan ialehkai ba kham hajrong, ka Karolina kan pynkhreh mynta ban iakhun pyrshah bad ka Sabalenka na ka bynta ka jingiaknieh ia ka jaka ha ka phainal. Na ka liang jong ka Svitolina ka lah dep ban pynpaw ruh ba kan ym khublei-kti bad ki nongiakhun pyrshah jong ka kiba dei na ka ri Russia ne Belarus hadien ba ka ri Moscow ka lah hiar thma ia ka Ukriane naduh u snem ba lah dep.
Ki result:
Women: QF: A Sabalenka ia ka E Svitolina da 6-4, 6-4; K Muchova ia ka A Pavlyuchenkova da 7-5, 6-2.
Men: T Etcheverry ia u Y Nishioka da 7-6(8), 6-0, 6-1; N Djokovic ia u K Khachanov da 4-6, 7-6(0), 6-2, 6-4.
