Shillong, Jylliew 08:
Sa shisien pat hapoh san snem, ka Meghalaya ka la pynmih hukum ban khang ïa ka jingwanrah dohkha nabar ka jylla hadien ba na ka jingpeit bniah ïa ki dohkha na kylleng ki distrik ka jylla la shem ba ka don ka jingpyndonkam kaba jur ïa ka dawai ‘Formalin’ ha ki dohkha kaba long kum ka bih bad kaba ktah jur ïa ka jingkoit jingkhiah.
Ha ka hukum ba la pynmih ha ka Sngi Palei, ka Commissioner of Food Safety, ka Kong RM Kurbah, IAS, ka la ong ba na ki 40 tylli ki dohkha ba la phah peit bniah, la shem ba ha ki 30 tylli na kita ki dohkha ka don ka dawai ‘Formalin’ bad ïa kane ka kaiphod la ai da u Assistant Food Analyst jong ka sorkar Meghalaya ha ka 6 tarik Jylliew, 2023.
Ka Kong Kurbah ka la ong ba ka jingdon jong ka ‘Formalin’ ha kitei ki dohkha ka long kum ka bih bad kaba ktah bha ïa ka jingkoit jingkhiah jong ki nongbam.
Katei ka heh sorkar ka la ong ba katkum ka Regulation 3.1.4 jong ka Food Safety and Standards (Food Products Standards & Food Additives) Regulations, 2011, ka paw ba ka dawai ‘Formalin’ kam don satia ha ka thup jong ki dawai kiba lah ban pyndonkam ha ki bam ki dih khnang ban pynneh pynsah ïa ki bad ba kin lait na ka jingsniew kloi.
Ha kajuh ka por, ka Kong Kurbah ka la ong ba ka jingsam, jingbuh bad jingdie ïa ki dohkha ba la ai da ka dawai ‘Formalin’ lane kiwei pat ki dawai ba khlem ai jingbit ka long kaba ma katkum ka kyndon 3(1)(zz)(v) jong ka Food Safety & Standard Act, 2006.
Namarkata, katkum ka jingpynkup bor da ka kyndon Clause (a) Sub-Section (2) jong ka Section 30 jong ka Food Safety & Standards Act, 2006, ka Kong Kurbah ka la mana ban buh, sam lane die ïa ki dohkha kiba wanrah na shabar ka jylla. Kane ka jingmana kan treikam na ka bynta 15 sngi tad haduh ban da lah ban shim da ki sienjam ban pynbeit ïa katei ka kam.
Ka Kong Kurbah ka la ong ba lada don kiba leh pyrshah ïa kane ka hukum, kin shah set patok haduh hynñiew snem bad kin hap ruh ban siew ïa ka kuna kaba haduh T. 10 lak kumba la ai ha ka kyndon 59 (iv) jong ka Food Safely & Standards Act, 2006.
Lah ban kdew kaba kum kane ka jingmana ka la treikam ruh ha u Naitung 2018 hadien ba la shem ba ka la don ka jingai dawai ‘Formalin’ ha ki dohkha.
