New Delhi, Jylliew:
Ka seng Congress ha ka sngi Balang ka la kynnoh ïa ka sorkar kmie hapoh ka jingïalam jong ka BJP ba ka la leh thurmur ha ka ban pyndep ïa ka kam jong ka na ka bynta ban pynheh ïa ka lynti rel ha ka jaka ba la jia ka jingïatakhuh jong ki rel bad ong ba ka la dei ban don ka jingujor ejahar da ka kynhun CBI pyrshah ïa u Myntri ka tnat Railway u Ashwini Vaishnaw bad u Myntri Rangbahduh u Narendra Modi halor ka jingkheiñ sting jong ki.
Ha ka por ba la don ka jingïalang bad ki nongthoh khubor, u nongaiktien jong ka seng Congress u Ajoy Kumar u la pynshisha da kaba ong ba ki la don ki jingïasuhbuit sniew sha lyndet na ka liang jong u Myntri ka tnat Railway ha kaba ka la shim ïa ka jingim jong ki 288 ngut bad pynmynsaw ïa palat 1,000 ngut ha ka jingïatakhuh jong lai tylli ki rel ha Balasore ha Odisha.
U President jong ka seng Congress u Mallikarjun Kharge ha ka jingphah jingthoh jong u lyngba ka Twitter u la ong: “Ki longïing jong ki 288 ngut ki briew kiba la ïap ha ka jingjia ha Odisha kin ym ïoh ïa ka jingbishar bahok lada ai ka jingïaroh ïa u Myntri ka tnat Railway. Ka jingbishar bahok kan sa long tang lada kito kiba donkti bad long ka daw kin ngat ha ki jingshah pynshitom.”
“Ka jingshisha ka long ba ha ki 9 snem ba la leit, ka sorkar jong u Modi ka la iehbeiñ ïa ka tnat Railways. Bad mynta ka ri ka la ngat ha ki jingeh na ka daw jong ka,” u la bynrap.
