Eindhoven, Jylliew:
Naduh kaba sdang jong ka jingiakhun, ka kynhun ialehkai Hockey jong ki shynrang ka India kam shym la lah ban ialehkai bha ha kaba katei ka kynhun ka lah mad noh ia ka jingshah pynrem ha ka kynhun iakhun pyrshah ka Netherlands da 4-1 kol ha ka lympung ialehkai ba mynta ka FIH Hockey Pro League.
Ha kaba iadei bad ka bynta jong ka jingiakhun hapdeng ki ar kynhun, ka khubor ka iathuh ba dei tang u kapten jong ka kynhun ialehkai ka ri u Harmanpreet Singh uba la lah ban pynioh ia katei ka shikol na ka jingiakhun baroh kawei ha ka minit ialehkai ba 11 bad ka long tan katei ka kol ba ka kynhun ka lah iohlad ban thep, watla ka Neds ka lah iohlad ban tied da palat san sien ka PCs (penalty corners) bad ka penalty stroke ruh kumjuh.
Kumta ka jinglah jong katei ka kynhun jingjop ban khur ia ki saw kol pyrshah ia ka India ka long na ka kol u Pepijn Reyenga ha ka 17min ialehkai, Boris Burkhardt 40min ialehkai bad ki ar kol na u Duco Telgenkamp ha ka minit ialehkai ba 41 & 58. Da kaba iaibat ia ki jingiai jop na ki jingialehkai ha London dang ha ka taiew ba lah dep, ka India ka lah iohlad ban ialehkai bha ha ki katto katne ki por ialehkai na ka bynta ban ioh ka lad ban tam kol shakhmat da 1-0 ha ka quarter ba nyngkong jong ka jingiakhun.
Watla ka kynhun ka lah shimpor na ka bynta ban pyneh ki thied ki jaw jong ka bad ban iai pynleit jingmut ha ka jingialehkai, ka kynhun ka lah sei ia kata ka rukom ialehkai kaba biang kaba la iarap ia ka kynhun ban ioh kamai ia ka lad ka lynti kaba biang hapoh ka kynhun iakhun pyrshah jong ka.
Dei ha ka minit ialehkai ba 11 ba ka India ka lah ioh ban khur ia katei ka shi kol lyngba ka PCs hadien ka foul na ka kjat jong uwei na ki rangialehkai defend ka Netherlands bad kata ka lah pynlong ia ka kynhun ban ioh katei ka kabu ksiar na ka bynta ban khur ia katei ka shi kol na ka jingialehkai baroh kawei haduh kaba wai noh.
