Shillong, Jylliew 08:
Ka synjuk ïalehkai jong ka Eastern Border Sports Association (EBSA) ka la dawa na u Myntri ka tnat ïalehkai ka Sorkar Jylla u Bah Shakliar Warjri na ka bynta ban pynïoh stadium ha Mawsynram.
Kane ka la wan hadien ba ki dkhot kane ka synjuk hapoh ka jingïalam u President Bah Alvin K. Sawkmie uba long ruh u MDC ka thaiñ, ki la leit ban ïakynduh ïa utei u Myntri ha kamra treikam ka jong u ha Secretariat.
Ha kane ka jingïakynduh na ka liang ka synjuk ka la ai ïa ka dorkhas ha utei u Myntri na ka bynta ban pynïoh Stadium ïa ka synjuk ha Mawsynram kaba dei ka Headquarter kane ka synjuk.
Na liang ka synjuk ka la pynpaw ïa ki jingeh kiba ju ïakynduh man ka por khamtam haba pynlong ïa ki lympung ïalehkai phutbol, namar ka jingbym biang ki jaka peitkai bad teng teng ki la don ki jingïakulmar. Kane ka wanrah ïa ka jingeh kaba khraw ban pynïaid ïa ki lympung ïalehkai.
Na ka liang u Bah Shakliar u la shah shkor ïa ka jingpynsngew katei ka synjuk bad u la kular ban ïaleh shitom lyngba ka tnat ïalehkai ban pynurlong ïa ka jingkyrpad bad khamtam na ka bynta ki ’rang bad ki ’thei ïalehkai ka thaiñ Border Mawsynram bad ïa ki paidbah ba ju ïeit ïa ki kam ïalehkai.
Kumta na liang katei ka synjuk ka la pynpaw ïa ka jingsngewkmen halor kane ka jingïakynduh ïa utei u Myntri naba ka la long kaba seisoh.
Ha kawei pat ka bynta na ka liang ka synjuk ka khot sngewbha ruh ïa utei u Myntri ba un long kum u kongsan ha ka jingïakhun final jong ka Super League 2023 ka ban long ha ka 13 tarik mynta u bnai ha ka por 1:30 noh phai sngi ha madan PWD Mawsynram.
Ha katei ka sngi ka jingïakhun kan long hapdeng ka Mawkhan SC pyrshah ïa ka Phlangmawsyrpat SC na ka bynta ban ïaknieh ïa ka nam lahduh. Kin don ruh ki jingpynbyrngia ïa ki nongpeitkai na uwei u nongrwai ba pawnam ka Ri Khasi u Bah Kupar Shadap bad kiwei.
