New Delhi, Jylliew:
Ka kynhun ialehkai Hockey jong ki kynthei ka ri (India) na ka kyrdan Junior, mynta ka lah pynthikna ia ka jingioh jaka sha ka jingiakhun semi-final ha ka lympung kaba dang long mynta jong ka Asia Cup. Kane ka wan urlong hadien ba ka lah ban pynjem khnap sa ia ka Chinese Taipei da 11-0 kol ha ka jingialehkai ba khatduh jong ki ar kynhun ha ka Pool.
Kumta ruh katei ka jingjop ka lah nang iai pynskhem shuh shuh ia ka kynhun baroh kawei ia ka kyrdan ba harjong ba ka shong mynta ha ka Pool A. Shuh shuh ruh katei ka kynhun ka lah pyndep ia ki jingialehkai ha ka rynsan jong ka group da ka jingbym shym la shah pynrem wat tang shisien ruh, ha kaba ka lah khur jingjop ha ki lai jingialehkai bad kawei ka jingiakhaid kol.
Haba phai pat mynta sha kitei ki 11 kol ba ka kynhun ka la lah ban kamai pyrshah ia ka tei ka kynhun ia aireng ba hadien ka long lyngba ka kol na ka Vaishnavi Vitthal Phalke (1min), Deepika (3 min), Annu (10, 52 min), Rutuja Dadaso Pisal (12 min), Neelam (19 min), Manju Chorsiya (33 min), Sunelita Toppo (43, 57 min), Deepika Soreng (46 min) bad ka Mumtaz Khan (55 min), ha kaba ka kynhun ka lah ioh ban pyniaid halade ia ka jingiakhun baroh kawei naduh kaba sdang da kaba sei bunsien ka jingialeh knieh bol shakhmat pyrshah ia ki thei ialehkai shakhmat ka Chinese Taipei bad kaba lah ioh ban plie ia ka jynkhang halade na ka bynta ka jingkamai kol lyngba ka shi kol na ka Vaishnavi bud pat sa ka kol na ka Deepika na ka bynta ban ai sha ka kynhun ia ka jingtam kol shakhmat da 2-0.
Shuh shuh ruh ka Annu & Rutuja ki lah ioh ban kamai kol ha shuwa ban kut noh ka por ialehkai ha ka quarter ba nyngkong bad pynlong ia ka kynhun ban khur da kaba suki a ki 4-0 kol. Ha ka quarter ba-ar jong ka jingiakhun, katei ka kynhun ka lah sdang da kumjuh ka rukom ialehkai, bad kaba lah iai pynneh ruh ia ka jngpyniaid jong ka ia ka jingialehkai da ka jinglah ban tan shalade ia ka bol bad ka jingkyntur beh bol shakhmat khlem shongthait bad ka Neelam ka lah ioh ruh ia ka lad ban pynioh sa ia ka kol basan bad pynlong ia ka kynhun ban khur ia ki 5-0 kol ha ka por jong ka jingia shongthait.
Shuh shuh ka kynhun ka lah iai bteng ia ka jingpyniaid jong ka, ha kaba ka Manju bad Toppo ki la lah ban kamai ia ki kol na ka bynta ban pynthikna ba ka quarter balai jong ka jingiakhun kan kut noh da ki 7-0 kol. Kumta ruh ki thei ialehkai ka kynhun kim shym la pynpaw kano kano ka dak jong ka jingsuki ban ialehkai ka jong ki ha ka quarter ba khatduh jong ka jingiakhun, ha kaba ka Deepika Soreng, Annu, Mumtaz Khan bad Toppo ki ioh ban kamai kol na ka bynta ban iarap ia ka kynhun ban khur ia ka jingjop na ka jingialehkai baroh kawei.
Hadien katei ka jingiakhun ka jong ka, katei ka kynhun ialehkai kan hap ban pynkhreh bha sa na ka bynta ban ia aireng pat bad ka Japan ne bad ka Kazakhstan ha ka rynsan iakhun semifnal lashai ka sngi (Saitjain).
