Shillong, Jylliew 08:
Ha kawei ka jingjia ha ka 3 tarik Jylliew ha ka por 7:20 janmiet, ki pulit ki la ïoh jingtip na u Secretary jong kawei ka shnong kaba don ha sor Shillong ha kaba la ujor ba ki la don katto katne ngut ki briew kiba la thombor ïa kawei ka khynnah ha kawei ka khlaw.
Hadien ba ïoh ïa kane ka jingtip, ki pulit na thanat Laitumkhrah ki la leit mar-mar sha katei ka jaka bad la lah ban pynthikna ba kawei ka khynnah ba dang hapoh 18 snem bad uwei u khynnah ba dang 18 snem ka rta, ki la shah bat ha ki lai ngut ki briew katba ki dang ïaid kai ha ka por janmiet.
La ong ba kita ki lai ngut ki la byrngem byrsit ïa kitei ki arngut namar ba ki la don ha katei ka khlaw, bad ki la dawa ruh ba ki dei ban siew ïa ka kuna.
Ha u kyrwoh khubor ba la phah ha ka Sngi Palei, u SP ka East Khasi Hills, Bah S Nongtnger, u la ong ba na kitei ki lai ngut, arngut ki la shoh la dat ïa utei u khynnah 18 snem katba uwei pat u la don bad katei ka khynnah.
Shuh shuh u Bah Nongtnger u la ong ba uta u khynnah 18 snem u la kyrpad ïa kitei ki lai ngut ba kin pyllait noh ïa katei ka khynnah bad u la pynpaw ïa ka jinglong kloi ban siew ïa kata ka kuna. Hynrei u SP u la ong ba kita ki lai ngut ki la phah ïa kitei ki arngut ki khynnah ba kin law noh ïa ki jaiñ.
Ha kajuh ka por, kitei ki lai ngut ki la lute ïa ki jingdon jingem jong kitei ki arngut. U SP u la ong ba katba ki dang shoh dang dat, uta u khynnah u la ïoh lad ban phet krad na katei ka khlaw bad u la wan poi sha katei ka shnong bad u la pan jingïarap na ki nongshong shnong shnong.
U Bah Nongtnger u la ong ruh ba kitei ki lai ngut ki la thombor ïa katei ka khynnah kaba dang hapoh 18 snem.
Kumta na ka liang ki pulit ki la pynrung da ka jingujor halor katei ka jingjia ha thanat Laitumkhrah hapoh ki kyndon jong ka aiñ POCSO Act.
Hadien ka jingtohkit, ki pulit ha ka Sngi Balang ki la ïoh kem ïa arngut napdeng kitei ki lai ngut na Khlieh Shnong, Malki katba ïa uwei pat la kem mynta ka sngi, la ong u SP.
