Shillong, Jylliew 09:
Ka shlem treikam jong ka District Sports Officer (DSO) West Khasi Hills District kan pynlong ïa ka lympung ïalehkai ki khynnah ba la tip kum ka District Level Subroto Mukherjee Cup Football Tournament ha Nongstoiñ naduh 26 tarik mynta u bnai.
Ïa kane ka lympung la phiah ha ki lai tylli ki kyrdan ïalehkai, kita ka Under-14 jong ki khynnah shynrang bad ka Under-17 jong ki khynnah shynrang bad kynthei.
Kat kum ka kyrwoh ba la pyllait da ka DSO Kong Balarina Syiem la ong ba ïa ki form lah ban ïoh ïa ka shlem treikam kaba ha Nongstoiñ tang ha ki por long trei. Ka tarik kaba khatduh ban pdiang ïa ki form kan long ha ka 13 tarik mynta u bnai ha ki shlem treikam jong ki block bapher bapher jong katei ka district bad hadien katei ym pdiang shuh.
Ka jingjurip ïa ki rta jong ki khynnah kan long ha ka 21 tarik ha Indoor Stadium, Ladweitang kaba ha Nongstoiñ naduh ka por 10 baje mynstep.
Na ka bynta ka Under-14, ki khynnah ki dei ban long kiba la kha ha lane hadien ka 1 tarik u Kyllalyngkot 2010, katba ha ka Under-17 ki khynnah ki dei ban long kiba la kha ha lane hadien ka 1 tarik u Kyllalyngkot 2007. La kyrpad ruh ïa ki khynnah ki dei ban wanrah lang ïa ki kot ki sla ki ban pynshisha ïa ka snem kha, Aadhaar Card bad ki Identity Card ba la ïoh na ki skul ba ki pule. Na ka bynta ki jingtip ba bniah ki lah ban phone ha kine ki number 9402300795 & 80142512420.
