New Delhi, Jylliew:
Katkum ka khubor ba lah ioh lum ka iathuh ba na ka liang jong ka sorkar pdeng ka ri (Ind) ka lah ai jingbit mynta ia ka kynhun ialehkai phutbol jong ka ri Pakistan na ka bynta ka jingshimbynta ha ka lympung ialehkai ka ban long ha Bengaluru ka SAFF Cup, naduh ka 21 tarik mynta u bnai haduh ka 4 tarik u Naitung 2023.
Kumta ruh na ka liang jong ka All India Football Federation (AIFF) lyngba u Secretary u Shaji Prabhakaran u iathuh ba ka sorkar pdeng jong ka ri India ka la leh la ka bynta da kaba ai jingbit mynta ia katei ka kynhun ialehkai jong ka ri ba marjan ha ka lympung ialehkai ka ban ia aireng da ki phra tylli ki ri ba marjan bad mynta ka shong sa tang ha katei ka ri ba marjan na ka bynta ban pyndep ia ki kam ki jam ki jong ka ha kaba iadei bad ki kot ki sla katkum ka lynti kaba dei ryngkat bad ka jingbud ryntih ia ki kyndon ka AIFF. Kumba ka paw mynta ha ka group ialehkai jong katei ka lympung ka long ba ka India bad Pakistan ki hap ha kajuh ka group bad ha kaba kitei ki ar kynhun ialehkai kin iakynduh paramaki ha ka 21 tarik mynta u bnai kum ka jingplie ia ka lympung ialehkai baroh kawei.
Shuh shuh ruh ha ka sien kaba nyngkong ha ki san snem ba kitei ki ar tylli ki ri kin ioh ban iakhun pyrshah paramaki ha kum katei ka lympung bad ka sien kaba khatduh ba ka kynhun ialehkai ka ri ka ioh ban iakhun pyrshah ia ka Pakistan ha ka jingialehkai phutbol ka long ha ka jingiakhun semifinal jong ka 2018 SAFF Championship; ha kaba ka India ka lah rah ia ka jingjop da 3-1 kol. Ki khubor ki iathuh ruh ba kiwei pat ki ri nalor kitei ki ar ri ki ban sa shimbynta ha katei ka lympung iakhun kaba mynta ki long ka kynhun ialehkai na Lebanon, Kuwait, Nepal, Bhutan, Bangladesh bad Maldives. Katba ka Sri Lanka kan ym lah ban shimbynta ha katei ka lympung naba haduh mynta ka dang hap ban mad ia ka jingshah sospon ka jong ka ha ka FIFA, katba ka Afghanistan ka lah weng noh ialade na ka SAFF na ka bynta ban leit pyniasoh pat bad ka Central Asian Football Federation ha ki khyndiat snem ba lah leit noh. Shuh shuh ruh ka Pakistan kam shym la ioh ban shimbynta ha ki ar lympung ialehkai na ki 13 tylli ki bynta jong ka lympung kiba lah dep ban long haduh mynta naduh u snem 1993.
