Shillong, Jylliew 09:
U Myntri Rangbah ka Jylla, Conrad K. Sangma u la ai khublei kyrpang ïa ka ’thei ïalehkai na Ri Bhoi District, ka Rinalis Ingti kaba la lah ban pynurlong da kaba khur ïa katakma ba nyngkong eh na ka bynta ka Jylla ha ka 66th National School Games 2023.
Kane ka khlur ïalehkai ka la lah ban khur ïa ka takma rnong ha ka High Jump hadien ba lah ban kynthoh 1.55m ha ka sngi Palei ha Bhopal, Madhya Pradesh.
“Ka Jylla ka sngewsarong ïa ka jinglah ka jong ka ban pynpaw ïa ka jingtbit ha katei ka lympung bad ngin ïai kyrshan ïa ka khnang ba kan nangkiew shaphrang ha ka kam ïalehkai jong ka,” la pynpaw u Conrad ha ka sla facebook lajong ha ka sngi Thohdieng.
Kum ban shu pynkynmaw ka Rinalis ka la lah ban kynjoh ha kajuh ka kyrdan ha ka Khelo India Youth Games ha u snem 2021.
